Ulag kommunikasiýalarynyň ösdürilmegi hormatly Prezidentimiziň alyp barýan syýasatynyň ileri tutulýan ugurlarynyň biridir.Bu möhüm strategik ulgamda ýurdumyzyň amala aşyrýan taslamalary halkara söwda-ykdysady, syýahatçylyk, medeni-ynsanperwer gatnaşyklaryny işjeňleşdirmek üçin uly mümkinçilikleri açýar.Demirýol pudagyny ösdürmegiň maksatnamasyny durmuşa geçirmek boýunça uly işler alnyp barylýar.
Hormatly Prezidentimiziň görkezmelerine laýyklykda, häzirki wagtda demir ýollaryny elektrikleşdirmek boýunça tapgyrlaýyn işler durmuşa geçirilýär.Demir ýol ulgamynyň maddy-enjamlaýyn binýadyny pugtalandyrmak, ýolagçylara edilýän hyzmatyň hilini ýokarlandyrmak işlerine yzygiderli gözegçiligiň üpjün edilmegine gönükdirilen anyk çäreler hem amala aşyrylýar.Şu ýylyň 1-nji iýulyndan başlap, demir ýol ulaglary ulgamyny döwrebaplaşdyrmak we ýolagçylara edilýän hyzmaty kämilleşdirmek hem-de ýolagçy gatnatmagyň möçberlerini artdyrmak maksady bilen, “www.railway.gov.tm” internet-saýty döredildi.
Bu bolsa, demir ýol ulaglaryndan peýdalanýanlar üçin hyzmatlaryň görnüşlerini giňeltmek boýunça meýilnamalaryň üstünlikli durmuşa geçirilýändiginiň subutnamasydyr.Maglumatlara girmek üçin aňrybaş ýeňillikleri döretmek maksady bilen “Demir ýol” ady bilen Android we iOS binýadynda ykjam telefonlar üçin ýörite gollanmalar işlenip taýýarlanyldy.
Ol ýolagçylara gatnawlaryň ugry bilen onlaýn-tertibinde tanyşmaga mümkinçilik berýär.Türkmen, iňlis we rus dillerinde taýýarlanan saýt ulanyja ýokary tizlikli ýa-da goşmaça düzümleri saýlap almak arkaly zerur bolan ýolagçy gatnawlarynyň ugraýan hem-de gelýän wagtyny we ýerini bilmäge, şol ýoluň ugrundaky duralgalaryň atlary bilen tanyşmaga ýardam eder.Bagtyýarlyk döwrümizde milli Liderimiziň demir ýol ulaglary ulgamyny ýokary derejä ýetirmek bilen baglanyşykly edýän tagallalary ýurdumyzyň ykdysadyýetiniň ösmegine, halkyň eşretli durmuşda ýaşamagyna uly goşant goşýar. “Türkmenistan Beýik Ýüpek ýolunyň ýüregi” ýylynda türkmen halkyny bagta ýetirip, bagtyýarlykda ýaşadýan, ulaglar düzüminiň has-da kämilleşmeginde bimöçber aladalary edýän Arkadag Prezidentimiziň jany sag, ömri uzak bolsun we il-ýurt bähbitli alyp barýan işleri elmydama rowaç alsyn!
Saparmyrat Igdirow,Daşoguz şäherindäki 9-njy orta mekdebiň mugallymy.