Daşoguz welaýatynda galla oragynyň depgini günsaýyn ýokarlanýar, ilkinji zähmet ýeňşini gazanan daýhan birleşikleriniň hatary artýar, şertnamalaýyn tabşyryklaryny berjaý eden kärendeçileriň sany köpelýär. Bu barada Türkmenistan gazetinde habar berildi.
Habarda bellenilişi ýaly, Görogly etrabynyň Aksaraý, Boldumsaz etrabynyň Döwletli, Saparmyrat Türkmenbaşy etrabynyň 27-nji oktýabr, Akdepe etrabynyň Pagtaçylyk, Köneürgenç etrabynyň Bereket daýhan birleşikleri welaýat boýunça öňdäkileriň hatarynda sepgide ýetdiler.
Şu ýyl Şabat etrabynyň S.Rozmetow adyndaky oba hojalyk paýdarlar jemgyýeti boýunça bugdaý ekilen 2420 gektar meýdandan 8 müň 524 tonna hasyl ýygnalyp, şertnamalaýyn tabşyryk 160 göterim berjaý edildi.
Boldumsaz etrabynyň 27-nji oktýabr daýhan birleşiginiň gallaçylary hem oragyň ilkinji günlerinde 690 gektar meýdandan 1400 tonna däne ýygnap, zähmet üstünligine eýe boldular. Olar bellenilen meýilnamadan 300 tonna bugdaýy artyk öndürdiler.
Habarda bellenilişi ýaly, galla oragy häzirki wagtda guramaçylykly dowam edýär.