Şu gün ýurdumyzyň Daşary işler ministrliginde wideomaslahat görnüşinde Aziýanyň ösüş bankynyň Merkezi we Günbatar Aziýa boýunça Baş direktory Werner Lipagyň ýolbaşçylygyndaky wekiliýet bilen duşuşyk geçirildi, onuň barşynda TürkmenistanOwganystanPakistanHindistan (TOPH) gaz geçirijisiniň taslamasyny amala aşyrmak bilen bagly meseleler ara alnyp maslahatlaşyldy.
Türkmenistanyň Aziýanyň ösüş banky bilen köpýyllyk hyzmatdaşlygynyň, hususan-da, energetika, ulag, şeýle hem hususy eýeçiligi ösdürmek we maýa goýum ugrundaky hyzmatdaşlygyň netijeliligi bellenildi.
TOPH gaz geçirijisiniň taslamasynyň ähmiýetine aýratyn üns berildi. Onuň gurluşygy Türkmenistanyň Prezidenti Gurbanguly Berdimuhamedowyň başlangyjy bilen ýaýbaňlandyryldy. Bellenilişi ýaly, bu taslamanyň amala aşyrylmagy sebitiň ykdysady integrasiýasyna oňyn täsir etmäge we ýewraziýa giňişliginde durmuş-ykdysady ösüşine gönükdirilen ähmiýeti nygtaldy.
Türkmenistanyň dünýäniň ýurtlarynyň ykdysadyýetini dikeltmek nukdaýnazaryndan aýratyn möhüm bolup durýan ulag-üstaşyr gatnawlarynyň kämilleşdirilmegine ygrarlydygy barada nygtalyp geçildi. “DemirgazykGünorta” demirýolunyň bilelikde durmuşa geçirilmegi hem-de elektroenergetika ulgamynda hyzmatdaşlyk ara alnyp maslahatlaşyldy. Şeýle hem taraplar geljek ýyl üçin hyzmatdaşlygyň ileri tutulýan ugurlaryny kesgitlediler.
Şu gün ýurdumyzyň daşary syýasat edarasynda wideomaslahat görnüşinde Türkmenistan bilen Belgiýa Patyşalygynyň Daşary işler ministrlikleriniň arasynda geňeşmeler geçirildi. Onuň wekiliýetine Belgiýa Patyşalygynyň Daşary işler, daşary söwda we ösüş ugrundaky hyzmatdaşlyk boýunça federal döwlet gullugynyň ikitaraplaýyn gatnaşyklar boýunça Baş direktory Anik Wan Kalster ýolbaşçylyk etdi.
Duşuşygyň barşynda taraplar syýasy, söwda-ykdysady we ynsanperwer ulgamlarda hyzmatdaşlygyň häzirki ýagdaýyny we esasy ugurlaryny ara alyp maslahatlaşdylar.
Taraplar energetika pudagynda hyzmatdaşlygy berkitmäge, umuman, özara gatnaşyklaryň täze usullaryny döretmek arkaly söwda-ykdysady hyzmatdaşlygy giňeltmäge özara gyzyklanma bildirdiler. Iki ýurduň ugurdaş edaralarynyň arasynda geňeşmeleri yzygiderli geçirmek arkaly hyzmatdaşlygy hil taýdan täze derejä çykarmagyň mümkinçilikleri barada pikir alşyldy. Ikitaraplaýyn gatnaşyklaryň şertnama-hukuk binýadyny ösdürmek boýunça meseleler hem ara alnyp maslahatlaşyldy.
Diplomatlar dostlukly türkmen-belgiýa hyzmatdaşlygyny ösdürmegi ugur edinýän işjeň gatnaşyklary dowam etmek barada ylalaşdylar. Şol gatnaşyklara milli Liderimiz Gurbanguly Berdimuhamedow Ýewropa Bileleşigi bilen netijeli hyzmatdaşlyk bilen baglylykda aýratyn ähmiýet berýär.
Şu gün “Türkmenaragatnaşyk” agentliginde wideoaragatnaşyk boýunça BMG-niň Çagalar gaznasynyň (UNISEF) Türkmenistandaky wekili Kristin Weýgand bilen duşuşyk geçirildi, onda kommunikasiýa tehnologiýalary ulgamynda ikitaraplaýyn hyzmatdaşlygyň ýagdaýy we ony ösdürmegiň mümkinçilikleri ara alnyp maslahatlaşyldy.
Taraplar döwlet derejesinde amala aşyrylýan maksatnamalaryň netijeli häsiýetini belläp, sanly bilim ulgamynda usullary kämilleşdirmek, durmuş goraglylygy we saglygy goraýyş ulgamlarynyň işini döwrebaplaşdyrmak bilen bagly bolan geljegi uly meýilnamalar barada pikirlerini beýan etdiler.
Missiýanyň ýolbaşçysy gaznanyň geçirýän işleri, hususan-da, ýokanç keselleriň öňüni almak boýunça durmuş mahabatyny türkmen teleýaýlymlary boýunça alyp görkezmek babatda işler barada gürrüň berdi. Bu mesele boýunça maslahatlar saglygy goraýyş işgärleri tarapyndan işlenip taýýarlanyldy. Saglygy goraýyş we derman senagaty ministrligi bilen bilelikdäki degişli işler ýola goýuldy.
SMS arkaly lukmançylyk maslahatlaryny müşderilere yzygiderli ugratmak “Altyn asyr” ýapyk görnüşli paýdarlar jemgyýeti bilen hyzmatdaşlyk taslamalarynyň biri bolup durýar. Şeýle hem hanym Weýgand saglygy goramagyň düzgünleri hakynda bilimleri ilatyň arasynda ýaýratmak üçin Internetiň mümkinçiliklerinden peýdalanmagy teklip etdi.
Onlaýn duşuşygyň dowamynda sanly wideoaragatnaşyk arkaly okuw sapaklaryny guramak meseleleri ara alnyp maslahatlaşyldy. “Elektron resminama, elektron resminama dolanyşygy we sanly hyzmatlar hakynda” Türkmenistanyň Kanunynyň hem-de hormatly Prezidentimiz Gurbanguly Berdimuhamedowyň gol çeken “Türkmenistanda elektron resminama dolanyşygy ulgamyny we Internet web-saýtlary döretmek we işe girizmek hakynda” Karary esasynda ýurdumyzyň dolandyryş edaralarynyň önümçilik işini awtomatlaşdyrmak, halk hojalygynda amatlyklary döretmek we elektron hyzmatlary ulgamyny kämilleşdirmek boýunça degişli işleriň alnyp barylýandygy nygtaldy.
Orta we ýokary okuw mekdeplerinde kompýuter torunyň ulgamyndan peýdalanmagyň ýola goýlandygy bellenildi. Şeýle hem Telekommunikasiýalar we informatika institutynda sanly ykdysadyýetde täze programma üpjünçilikleri işläp düzýän we innowasion oýlap tapyşlary bilen meşgullanýan hünärmenler taýýarlanylýar. “Türkmenaragatnaşyk” agentligi tarapyndan bu ugurda bilimli, ussat hünärmenleri ýüze çykarmak maksady bilen, “Sanly çözgüt-2020” atly innowasion taslamalaryň bäsleşigi geçirildi.
Ýakynda ýurdumyzda ilkinji milli “tmchat” messenjer onlaýn programmasy işe girizildi hem-de sanly.tm täze elektron poçtasy hereket edip başlady.
Duşuşygyň ahyrynda taraplar gatnaşyklaryň ösdürilmegine gyzyklanmany tassykladylar. Duşuşyga gatnaşyjylaryň pikirine görä, häzirki ýagdaýlaryň maglumatlary we bilimleri ýaýratmak, şol sanda çagalaryň saglygyny goramagyň bähbidine ýaýratmak üçin kommunikasiýalary ösdürmegiň strategik ähmiýetini şöhlelendirýär.