UEFA Çempionlar Ligasynyň 67-nji finalynda Liwerpul bilen “Real Madrid” duşuşdy.Parižiň golaýyndaky Sen-Denide ýerleşýän “Stad de Frans” stadionynda oýnalan finalda “Real Madrid” topary 1-0 hasabynda ýeňşini baýram etdi.
Janköýerleriň ýoldaky dyknyşyk sebäpli giç gelmegi zerarly duşuşyk 36 minut giç başlady.Birinji ýarymy golsuz geçen duşuşygyň ýeke-täk pökgüsini 59-njy minutda Walwerdeniň pasyndan soň Winisius Junior öz adyna ýazdyrdy.
Edil birinji ýarymda bolşy ýaly, “Liwerpul” 2-nji ýarymda-da örän amatly pursatlary döretdi. Ýöne her gezeginde-de olara derwezeçi Tibo Kurtiany geçmek başartmady.Aýratynam Mohamed Salahyň 2-3 howply urgusynda Kurtua öz ussatlygyny görkezdi.
Duşuşykdan soň 9 urgyny sowmagy başaran Kurtua oýnuň iň ökde oýunçysy diýlip saýlandy. Şeýlelikde, derweze ýekeje takyk urgy (umumylykda 3 urgy) geçiren “Real Madrid” 1-0 hasabynda ýeňiş gazanyp, 14-nji gezek UEFA-nyň iň uly kubogyny gazanmagy başardy (1956, 1957, 1958, 1959, 1960, 1966, 1998, 2000, 2002, 2014, 2016, 2017, 2018, 2022).
Bu ugurda kubogy 2-nji ýerdäki Milandan iki esse köp gazanan “Real Madrid” topary arany ep-esli açdy. 5-nji gezek finala çykan toparyň tälimçisi Karlo Ançelotti Çempionlar Ligasynyň kubogyny 4 gezek gazanan ilkinji tälimçi boldy. 15 gol bilen ýaryşyň iň netijeli futbolçysy bolan Karim Benzema, şol sanda Dani Karwahal, Luka Modriç Çempionlar Ligasynyň kubogyny 5-nji gezek eýeläp, bu babatda Kristiano Ronaldo bilen deňleşdi. “Real Madrid” ýaryş Çempionlar Ligasy adyny alaly bäri 8 gezek finala çykyp, 8-sinde hem kubogy gazanmagy başardy.
Ol şol 8 finalda “Ýuwentus”, “Atletiko Madridi” hem-de “Liwerpuly” 2 gezek ýeňmegi başardy.Beýleki 2 finalda-da “Walensiýa” bilen “Baýer” toparyndan üstün çykdy.