Ýewropanyň öňdebaryjy çempionatlarynyň biri-de Germaniýanyň “Bundesligasy” bolup, UEFA-nyň iň uly kubogyny tamamlanan möwsümde nemes topary “Bawariýa” gazandy. Edil “Ýuwentusyň” “Serie A”-daky başarnygyny “Bundesligada” gaýtalaýan “Bawariýa” täze 58-nji möwsümde-de çempionlygyň iň esasy, “Borussiýa Dortmund” topary-da çempionlygyň 2-nji dalaşgäri hasaplanýar.
Şu gün “Bundesliganyň” täze möwsümine badalga berler. Möwsümiň ilkinji duşuşygynda çempion “Bawariýa” öz meýdançasynda “Şalke” toparyny kabul eder. 23:30-da başlanjak oýun “Türkmenistan sport” teleýaýlymy arkaly göni ýaýlymda görkeziler.
“BAWARIÝA”. Geçen möwsümi 3 kubok bilen we ýene-de birnäçe kubogyň bosagasynda duran “Bawariýa” gürrüňsiz nemes futbolynyň lokomotiwi.Hans-Diter Flikiň tälimçiligindäki topar Leroý Saneni transfer etdi.
Toparyň düzüminden Kountinio, Perişiç öňki klublaryna dolandy.Münhenliler Tiago Alkantarany-da “Liwerpula” transfer etdiler.Muňa garamazdan, Lewandowski, Gnabri, Goreska, Noýer, Alaba, Dewies, Koman ýaly ýyldyzlaryna bil baglaýan toparyň bassyr 9-njy çempionlygyny-da gazanmagy üçin hiç hili päsgelçilik ýok.
“BORUSSIÝA D”. Ýurduň ikinji iň uly topary “Borussiýa Dortmunddan” Hakimi, Gýotse ýaly oýunçylar topardan ugratdy. Tomas Moýneri, Jude Bellingemi transfer eden dortmundlylar ýene-de Lusen Fawreniň tälimçiliginde “Bawariýanyň” ýalňyşaryna garaşyp, çempionlyk ugrunda ýiti göreş alyp bararlar. Toparyň janköýerleri Holann, Sanço, Roýs, Witsel, Torgan Hazar ýaly oýunçylardan uly tama edýärler.
“LEIPSIG”. Esasy ýyldyzy Timo Werneri “Çelsä” ugradan “Leipsig” toparynyň janköýerleri ýaş tälimçi Ýulien Nagelsmanna uly ynam bildirýär. Çempionlar ligasynda şowly çykyş eden “Leipsig” yzly-yzyna 2 gezek bürünç medala mynasyp boldy we täze möwsümde-de iň bolmanda, şol başarnygyny gaýtalamak üçin göreşer.
BEÝLEKILER. Münhengladbah şäheriniň “Borussiýa” topary, esasy oýunçylaryny ugradan “Baýeri”, şol sanda “ŞalkeNI” öňdäki orunlaryň iň esasy dalaşgär toparlary hökmünde görkezmek bolar.
18 toparyň çykyş edýän “Bundesligasynda” 11 klubuň tälimçisi ýerli hünärmenlerdir. ABŞ-dan, Awstriýadyr Şweýsariýadan 2 hem-de Niderlandlardan 1 tälimçi nemes klublaryna tälim berer.
Liganyň täze klublary “Ştutgart” bilen “Arminia Bielefeld” toparlarynyň birinjisi 1 ýyllyk arakesmeden soň, “Bundesliga” dolandy. “Arminia Bielefeld” bolsa, 11 ýyldan soň, nemes futbolynyň iň ýokary ligasynda çykyş eder.