Türkmenistanyň prezidentiniň nebit-gaz meseleleri boýunça geňeşçisi Ýagşygeldi Kakaýew 10-njy dekabrda Gurbanguly Berdimuhamedowa TOPH gaz geçirijisiniň Owganystanyň we Pakistanyň çäklerinden geçýän bölegini gurmagyň taslamasyny ätiýaçlandyrmagyň strategiýasyny taýýarlamak, şertnamalary baglaşmak boýunça “TAPI Pipeline Company Limited” paýdarlar jemgyýeti tarapyndan yglan edilen halkara bäsleşigiň netijeleri barada habar berdi.
TDH-nyň maglumatyna görä, bäsleşigi geçirýän topara tehniki-täjirçilik teklipleri, hususan-da, Britaniýanyň “Willis Towers Watson” kompaniýasyndan amatly teklip gelip gowuşdy.
Gurbanguly Berdimuhamedow TOPH gaz geçirijisini gurmak boýunça işleriň barşyny makullap, Kakaýewe onuň taslamasy boýunça halkara guramalar, maliýe düzümleri we nebit-gaz kompaniýalary bilen gatnaşyklary ýola goýmak bilen bagly birnäçe anyk tabşyryklary berdi.
Ýatladýarys, 7-nji dekabrda Pakistanyň Nebit ministrliginde TOPH geçiriji kompaniýasynyň (TAPI Pipeline Company Ltd) başlygy Muhammetmyrat Amanow bilen Pakistanyň nebit we tebigy serişdeler ministri Gulam Sarwar Hanyň arasynda duşuşyk bolup, türkmen tarapy ministrden 2019-njy ýylyň martynda gaz geçirijiniň pakistan böleginiň düýbüni tutmak dabarasynyň gurnalmagyny we bir ýylyň dowamynda onuň gurluşygyna başlanmagyny sorady.
Pakistanyň “Dawn” neşiriniň Amanowa salgylanyp ýazmagyna görä, Pakistana çenli geçiriji gurmak iki ýyl wagt alar, onuň Hindistana ýetirilmegi üçin bolsa ýene 6-8 aý gerek bolar.
Amanow noýabryň ortasynda gaz geçirijiniň bahasynyň 10 milliard dollardan 7 milliard dollara çenli aşak düşürilendigini aýtdy.Bir hepde soň Türkmenistan TOPH-yň öz territoriýasyndan çekilmeli bölegi üçin 40 million dollarlyk turba satyn aldy, ýogsam bolmanda ozal geçirijiniň Türkmenistanyň territoriýasyndan geçmeli böleginiň gurlup gutarylandygy habar berlipdi.
Willis Towers Watson dünýäde ululygy boýunça üçünji orunda durýan ätiýaçlandyryş kompaniýasy bolup, 140-dan gowrak ýurtda işleýär.