19-njy oktiýabrda prezident Berdimuhamedow Türkiýäniň “Rönesans Holding” şirketiniň başlygy Erman Ylyjagy kabul etdi.
Duşuşykda türk telekeçisi täze taslamalaryň işlenip taýýarlanylyşy we teklipler barada maglumat berdi diýip TDH döwlet täzelikler gullugy habar berýär.
Prezident türkmen tarapynyň esasy talabyny—gurluşygy we desgalary şertnamada bellenilişi ýaly öz wagtynda tabşyrmak babatdaky tertibiň berk berjaý edilmegini ýatlatdy.
TDH-niň ýatlatmagyna görä, “Rönesans Holding”şirketi Türkmenistanda 12 ýyllap işlän döwründe ençeme düýp gurluş desgalaryny şol sanda, Ýaponiýaly partniýorlary bilen birlikde “Marykarbamid”zawody (şu ýylyň fewralynda prezident “Marykarbamidiň” bary-ýogy 62,5 göterim kuwwadynyň ulanylandygyna närzalygyny bildiripdi-red.belligi), Ahal welaýatyndaky tebigy gazdan sintetiki benzin öndürjek zawody we 3-nji sentiýabrda açylan elektrik merkezini Çärjew etrabynda gurdy.
Geçen ýylyň oktiýabrynda Rönesansyň guran “Diwan” myhmanhanasy açyldy.
Ýeri gelende bellesek, golaýda türk we çet ýurt mediasy Türkmen hökümeti bilen 12 ýyllap jebis hyzmatdaşlyk edýän we Türk prezidentiniň köşgüni hem guran “Rönesans Holding” şirketiniň resmi taslamalardan gazanan girdejileriniň bir bölegini salgytdan gaçyrandygy we 210 million dollary Britaniýanyň Wirjiniýa adalaryna geçirendigi barada“Panama Papersde” çap edilen maglumatlary ýazdylar.
Emma,sahsy baýlygy 2015-nji ýylda 2,1 miliýard dollar bolan we onuň 2021-nji ýylda iki esseden gowrak artyp, 4,4 miliard dollara ýeten tüçjar milliarder Erman Ylyjagyň “Rönesans Holding”şirketiniň “Panama Papersiň maglumatlaryny ýalana çykarandygy hem habar berildi.
Rönesans bilen birlikde merhum Nyýazow eýýamyndan bäri Türkmenistanda dürli taslamalary amala aşyran we aşyrýan tüçjar milliarder Ahmet Çalyk hem “Panama Papersiň” ahyrky maglumatlarynda salgytdan pul gaçyranlaryň sanawyna goşuldy diýip türk mediasy ýazdy.
The post Berdimuhamedow “Rönesans Holdingiň” başlygyny kabul etdi first appeared on Türkmenistanyň Hronikasy.