Türkmenistanyň prezidenti Gurbanguly Berdimuhamedow ýurduň içeri işler ministri Mämmethan Çakyýewi “başga işe geçýändigi sebäpli” eýeleýän wezipesinden boşatdy.
1-nji iýulda geçirilen Hökümet we Howpsulyk geňeşiniň giňişleýin maslahatynda polisiýanyň general-maýory Çakyýewiň anyk haýsy wezipä geçýändigi aýdyňlaşdyrylmady.
Türkmenistanyň täze içeri işler ministri wezipesine Öwezdurdy Hojanyýazow bellendi. Ol mundan öň içeri işler minstriň orunbasary wezipesini eýeleýärdi. Prezidentiň beýleki aýratyn buýrugy bilen Hojanyýazowa polisiýanyň polkownigi çini berildi.
Çakyýew 2019-njy ýylyň oktýabrynda içeri işler ministri wezipesine bellenipdi.
IIM-niň ýolbaşçylary ýygy-ýygydan, köplenç açyk aýdylmaýan "kemçilikleri" sebäpli täzelenip durýar. Synçylar soňky otuz ýyldaky 12 ministriň arasynda Poran Berdiýew bilen Isgender Mulikowyň öz wagtynda döwlet baştutanyna iň ýakyn duran we soň has agyr jeza çeken resmiler bolandygyny belleýärler.
Ýatlatsak, IIM-niň ministri wezipesinde iň köp saklanan we ahyrynda korrupsiýada aýyplanyp, uzak möhletli türme tussaglygyna höküm edilen Isgender Mulikow döwlet TW-sinde kellesi syrylan, eli gandally ýagdaýda görkezildi.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.