Germaniýanyň Baýer kluby Ýewropa ligasynyň ýarym finalynyň jogap oýnunda Italiýanyň Romasy bilen 2:2 hasabynda deň oýnady hem-de iki oýnuň jemi boýunça garşydaşyndan üstün çykyp, ýaryşyň finalynda ýollanma aldy. Duşuşyk Lewerkuzen şäherinde geçirildi.
Maglumat üçin, Baýer şu möwsümde ýeňlişe sezewar bolman gelýär. Habi Alonsodan tälim alýan toparyň ýeňlişsiz ýörişi 49 oýna ýetdi. Şeýlelikde, Baýer resmi oýunlardaky iň uzyn ýeňlişsiz ýöriş boýunça täze rekordyň eýesi boldy. Mundan ozalky rekord 1963-nji ýylyň 22-nji dekabryndan 1965-nji ýylyň 7-nji fewralyna çenli döwürde bassyr 48 resmi oýny ýeňlişsiz tamamlan Benfika degişlidi.
Baýer Ýewropa ligasynyň finalynda ýene bir italýan kluby Atalanta bilen duşuşar. Atalanta ýarym finalda Fransiýanyň Marsel klubundan (1:1, 3:0) üstün çykdy.
Atalanta öz taryhynda ilkinji gezek ýewrokuboklaryň finalynda çykyş eder. Baýer bolsa Ýewropanyň klublaryň arasyndaky ikinji derejeli ýaryşynyň finalynda ikinji gezek meýdança çykar. Bu topar 1988-nji ýylda UEFA Kubogunyň finalynda Espanýoly utup, çempion bolupdy. 2022-nji ýylda bolsa nemes kluby Ýewropa çempionlar ligasynyň finalynda meýdança çykyp, Realdan 2:1 hasabynda ýeňlişe sezewar boldy.
Ýewropa ligasynyň häzirki çempiony Ispaniýanyň Sewilýa toparydyr. Ýaryşyň şu ýylky finaly 22-nji maýda Dublin şäherinde geçiriler.