UEFA-nyň klub derejesindäki iň uly bäsleşigi bolan Çempionlar Ligasynyň 31-nji, umumylykda-da 68-nji möwsüminiň toparçalarynyň bijeleri çekildi.Bijä laýyklykda, “C” toparça güýçli klublary özünde jemleýär.
Olar “Bawariýa”, “Barselona, “Inter” hem-de Çehiýanyň “Wiktoriýa Plzen” toparlarydyr.Soňky çempion “Real Madrid” “F” toparçada “Leipsig”, “Şahtýor Donesk” hem-de “Seltik” bilen bije çekişdi. “A” toparçada “Aýaks”, “Liwerpul”, “Napoli” hem-de “Reýnjers” klublary duşuşar.
Şu möwsümde çykyş etjek 32 klub 15 ýurda wekilçilik edýär.Germaniýadan taryhda ilkinji gezek 5 klub çykyş edip, Ýewropa Ligasynyň çempiony hökmünde ýaryşa goşulan “Aýntraht” topary 1-nji sapar Çempionlar Ligasyna gatnaşýar.
Mundan öň 3 gezek bir ýurtdan 5 klub çykyş edipdi. 2015/16 we 2021/22 möwsümlerinde Ispaniýadan hem-de 2017/18 möwsüminde-de Angliýadan 5 topar gatnaşypdy.
Şu möwsümde 5 şäherden 2 klub çykyş eder. Olar Şotlandiýanyň Glazgo şäherinden “Seltik” bilen “Reýnjers”, Ispaniýanyň paýtagty Madridiň “Real” bilen “Atletiko”, Italiýanyň Milan şäheriniň “Milan” hem-de “Inter”, şeýle-de, Angliýanyň paýtagty Londonyň “Çelsi” we “Tottenham”, Portugaliýanyň paýtagty Lissabonyň “Benfika” bilen “Sporting” klublarydyrlar.
Toparçalardaky duşuşyklar Dünýä Kubogy sebäpli ozalkylardan ir başlap, ir tamamlanar. Şol sanda gysga aralyklarda oýnalar. 1-nji duşuşyklar 6-7-nji sentýabrda, 2-nji duşuşyklar 13-14-nji sentýabrda, 3-nji duşuşyklar 4-5-nji oktýabrda, 4-nji duşuşyklar 11-12-nji oktýabrda, 5-nji duşuşyklar 25-26-njy oktýabrda hem-de 6-njy duşuşyklar 1-2-nji noýabrda geçiriler. 2-nji tapgyryň ýa-da 1/8 finalyň duşuşyklary geljek ýylyň fewral (14-15-nji, 21-22-nji) we mart (7-8-nji, 14-15-nji) aýlarynda geçirilse, çärýek final aprelde, ýarym final duşuşyklary-da maý aýynda oýnalar.
Final duşuşygy bolsa 2023-nji ýylyň 10-njy iýunynda Stambul şäherindäki Atatürküň adyny göterýän Olimpiýa stadionynda geçiriler.
A TOPARÇA:
Aýaks (Niderlandlar),
Liwerpul (Angliýa),
Napoli (Italiýa),
Reýnjers (Şotlandiýa)
B TOPARÇA:
Porto (Portugaliýa),
Atletiko Madrid (Ispaniýa),
Baýer (Germaniýa),
Klub Brýugge (Belgiýa)
C TOPARÇA:
Bawariýa (Germaniýa),
Barselona (Ispaniýa),
Inter (Italiýa),
Wiktoriýa Plzen (Çehiýa)
D TOPARÇA:
Aýntraht (Germaniýa),
Tottenham (Angliýa),
Sporting (Portugaliýa),
Marsel (Fransiýa)
E TOPARÇA:
Milan (Italiýa),
Çelsi (Angliýa),
Red Bull Salsburg (Awstriýa),
Dinamo Zagreb (Horwatiýa)
F TOPARÇA:
Real Madrid (Ispaniýa),
RB Leipsig (Germaniýa),
Şahtýor Donesk (Ukraina),
Seltik (Şotlandiýa)
G TOPARÇA:
Mançester Siti (Angliýa),
Sewilýa (Ispaniýa),
Borussiýa Dortmund (Germaniýa),
Kopengagen (Daniýa)
H TOPARÇA:
Pari Sen-Žermen (Fransiýa),
Ýuwentus (Italiýa),
Benfika (Portugaliýa),
Makkabi Haýfa (Ysraýyl)