Golaýda ABŞ-nyň Alýaska ştatynda Jo Çmelek atly balykçynyň toruna täsin görnüşdäki balyk düşdi. Seýrek duş gelýän bu balygyň derisiniň käbir ýerleri we etiniň reňki gök bolup, teňňelerinde mämişi reňkli tegmilleriniň bardygy bellärliklidir. Balykçy, bişirilen wagty balygyň etiniň gök reňkden ak reňke öwrülýändigini aýtdy.
Balykçy haýal etmän täsin balygyň suratyny jemgyýetçilik torundaky akkaundynda ýerleşdiripdir. Gysga wagtyň içinde gök we mämişi reňkli balygyň suraty görenleri haýran galdyrdy.
Alýaska ştatynyň Balyk hojalygynyň bölüminiň wekiliniň beýanatynda balyklaryň reňkli görnüşlerindäki etindäki simabyň mukdaryny kesgitlemek mümkinçiligiň ýokdugy sebäpli bu balyklary iýmezligi maslahat berýär.
“Daş gaýa balygy” (“Hexagrammos lagocephalus”) diýlip atlandyrylýan bu deňiz jandary adatça, Kaliforniýanyň kenarlaryndan Bering deňzine çenli aralykda Ýuwaş ummanda duş gelýär.
Batyr Haýydow, Ýagşygeldi Kakaýew adyndaky Halkara nebit we gaz uniwersitetiniň talyby.