Balkan welaýat Baş bilim müdirliginiň hem-de Türkmenistanyň Kärdeşler arkalaşyklarynyň welaýat birleşmesiniň bilelikde guramaklarynda Medeniýet we sungat işgärleriniň hem-de Magtymguly Pyragynyň şygryýet güni mynasybetli welaýatymyzdaky umumybilim berýän orta mekdeplerde, mekdebe çenli çagalar edaralarynda zähmet çekýän bilim işgärleriniň arasynda Magtymguly Pyragy — ynsan kalbynyň öçmejek nury atly bäsleşigiň welaýat tapgyry geçirildi. Bu barada Balkan gazeti habar berýär.
Bäsleşige gatnaşanlar şahyryň ömri we döredijiliginden taýýarlanan test soraglaryna jogap berdiler. Söz ussadynyň goşgy bentleriniň galdyrylan hem-de nakyla öwrülen setirlerini ýazmakda, onuň durmuş ýoluna we döredijiligine degişli suratlar bilen işlemekde bäsleşdiler.
Netijede, Serdar şäherindäki 10-njy orta mekdebiň mugallymy Sülgünjemal Hangeldiýewa birinji, Etrek etrabyndaky 4-nji orta mekdebiň mugallymy Ýolmämmet Hudaýgulyýew bilen Balkanabat şäherindäki iňlis dili, fizika we matematika derslerini çuňlaşdyryp öwredýän ýöriteleşdirilen 22-nji orta mekdebiň mugallymy Orazgül Meredowa ikinji, Balkanabat şäherindäki daşary ýurt dillerine ýöriteleşdirilen 3-nji orta mekdebiň mugallymy Nurana Agabaýewa hem-de Serdar şäherindäki 11-nji orta mekdebiň mugallymy Handurdy Garaýew üçünji orunlara mynasyp boldular.
Bäsleşigiň ýeňijilerine ony guraýjylar tarapyndan Diplomlar hem-de ýadygärlik sowgatlary gowşuryldy.