Aziýanyň Ösüş banky şu ýyl Aziýanyň ösüp barýan ýurtlarynda ösüş çaklamasyny 4,6%-e çenli peseltdi, aprel aýynda bank ösüşiň 5,2% derejesinde bolmagyny çaklapdy. Bu barada bankyň metbugat relizinde habar berilýär diýip, centralasia.media belleýär.
Onuň bellemegine görä, esasy şert täze COVID-19 lokdaunlary bilen baglanyşykly bökdençlikler sebäpli HHR-de ösüşiň haýallamagy, şeýle-de global islegiň gowşaklygy boldy. Şu ýyl HHR-iň ykdysadyýetiniň ösüşi öňki 5% derejesindäki çaklama bilen deňeşdirilende 4% bolar.
AÖB Hindistanyň hem ykdysady ösüş çaklamasyny ýokary inflýasiýa we pul-karz syýasatynyň berkemegi sebäpli 7,5%-den 7,2%-e çenli peseltdi. Şu ýyl Aziýa-Ýuwaş umman sebitiniň ösüp barýan ýurtlarynda inflýasiýa öňki 3,7% derejesindäki çaklama bilen deňeşdirilende 4,2%-e çenli ýokarlanar diýlip çaklanylýar. Şeýle-de bolsa, sebitde inflýasiýa basyşy dünýäniň beýleki ýerlerine garanyňda henizem pes. 2023-nji ýyl üçin AÖB sebitdäki ykdysady ösüş çaklamasyny 5,3%-den 5,2%-e çenli peseltdi, inflýasiýa çaklamasyny 3,1%-den 3,5%-e çenli ýokarlandyrdy.
Käbir kiçi sebitler üçin ösüş çaklamasy ýokarlandyryldy.Günorta-Gündogar Aziýa üçin çaklama koronawirus pandemiýasy sebäpli girizilen çäklendirmeleriň gowşadylmagy bilen içerki islegiň ýokarlanmagy netijesinde öňki çak edilen 4,9%-den şu ýyl 5%-e çenli ýokarlandy.
Kawkaz we Merkezi Aziýa ýurtlary üçin çaklama 3,6%-den 3,8%-e çenli ýokarlandyryldy. Ýuwaş umman sebitiniň ösüş çaklamasy Fijä syýahatçylygyň dikeldilmegi netijesinde 3,9%-den 4,7%-e çenli ýokarlandy.
AÖB 1966-njy ýylda döredildi.Onuň paýdarlary 68 döwlet bolup, olardan 49-sy sebitde ýerleşýär.