16-njy maýda Gazagystan Respublikasynyň Astana şäherinde Merkezi Aziýa ýurtlarynyň howpsuzlyk geňeşleriniň sekretarlarynyň ilkinji ýygnagy geçirildi. Gazagystanyň Prezidenti Kasym Žomart-Tokaýewiň ýolbaşçylyk etmeginde geçirilen duşuşygyň daşarky we içerki howpsuzlyk meseleleri boýunça pikir alyşmalar boldy.
Gazagystanyň Prezidentiniň Metbugat gullugynyň habar bermegine görä, bäştaraplaýyn duşuşygyň dowamynda Merkezi Aziýa ýurtlarynda howpsuzlygy pugtalandyrmak, sebit we halkara derejesindäki derwaýys meselelere bilelikde tagalla görmek boýunça durmuşa geçirilýän işler dogrusynda maslahatlaşyldy.
Gazagystanyň Prezidenti öz çykyşynda sebitleýin hyzmatdaşlygyň ähli ugurlarda işjeň ösýändigini nazara almak bilen, döwletara syýasy gatnaşyklaryň yzygiderli pugtalandyrylýandygyny nygtady.Bellenilişi ýaly, soňky bäş ýylda sebitara söwda 80%-den gowrak ýokarlandy we 10 milliard dollardan geçdi. Şol bir wagtyň özünde, ýurtlaryň arasynda eksport-import amallaryny yzygiderli ýokarlandyrmak we harytlaryň görnüşini köpeltmek meselesi yzygiderli öwrenilýär.
Uly sebit taslamalary diňe bir göze görnüp duran peýdalary getirmän, eýsem, Merkezi Aziýanyň ykdysadyýetiniň ähli babatda pugtalanmagyna oňyn täsirini ýetirýär.
Gazak Lideriniň belleýşi ýaly, Howpsuzlyk geňeşleriniň sekretarlarynyň şu gezekki duşuşygy 9-njy awgustda Astanada geçiriljek Merkezi Aziýa döwletleriniň Prezidentleriniň altynjy maslahatyna taýýarlyk görmegiň çäklerindäki möhüm çärä bolup durýar.
Bu duşuşyga Gazagystanyň Howpsuzlyk geňeşiniň sekretary Gizat Nurdauletow, Gyrgyzystanyň Howpsuzlyk geňeşiniň sekretary Marat Imankulow, Täjigistanyň Howpsuzlyk geňeşiniň sekretary Nasrullo Mahmudzoda, Özbegistan Howpsuzlyk geňeşiniň sekretary Wiktor Mahmudow we Türkmenistanyň Gazagystandaky ilçihanasynyň harby attaşesi Annamyrat Ýagmyrow gatnaşdylar.