12-nji oktýabrda paýtagtymyzda Türkmen-mongol işewürlik maslahaty geçirildi.Munuň özi Türkmenistan bilen Mongoliýanyň arasynda söwda-ykdysady, saglygy goraýyş, ulag-logistika, oba hojalygy, gaýtadan işleýän senagat ýaly ugurlardaky hyzmatdaşlygyň ösdürilmegine gönükdirilen möhüm çäredir.
Foruma iki ýurduň dürli ministrlikleriniň we pudaklaýyn dolandyryş edaralarynyň, Türkmenistanyň Söwda-senagat edarasynyň, Senagatçylar we telekeçiler birleşmesiniň wekilleri, iki tarapdan hususy kompaniýalaryň ýolbaşçylary gatnaşdylar.
Forumda ykdysadyýetiň dürli ugurlarynda bilelikdäki maýa goýum taslamalaryny amala aşyrmagyň mümkinçiliklerine garaldy.Myhmanlar Garaşsyz, baky Bitarap Türkmenistanda daşary ýurtly hyzmatdaşlaryň netijeli iş alyp barmaklaryna gönükdirilen ygtybarly kanunçylyk binýadynyň oňyn täsirine ünsi çekdiler.
Häzirki döwürde daşary döwletlerden getirilýän harytlaryň ornuny tutýan önümçilikleriň döredilmegine we dünýä bazarlarynda uly islegden peýdalanýan ýerli önümleriň möçberini artdyrmagyň hasabyna ýurdumyzyň eksport kuwwatynyň ýokarlandyrylmagyna uly ähmiýet berilýär.Foruma gatnaşyjylar ýokary tehnologiýalary we öňdebaryjy usullary özleşdirmek üçin özara tejribe alyşmagyň zerurdygyny nygtadylar.
Taraplar şu gezekki forumyň türkmen-mongol ykdysady gatnaşyklaryny ösdürmäge itergi berjekdigine ynam bildirdiler.