Aşgabatda 23-28-nji dekabr aralygynda paýtagtymyzyň ýaşaýjylarynda we onuň myhmanlarynda gaýtalanmajak täsirleri galdyrjak baýramçylyk aýdym-sazly çykyşlara beslenjek konsert tapgyrlary geçiriler. Guramaçylar dürli ýurtlaryň ady belli artistleriniň gatnaşmagynda giň konsert maksatnamasyny taýýarlaýar diýip, ýerli köpçülikleýin habar beriş serişdeleri habar berýärler.
Konsert bildirişinde beýan edilişi ýaly, bu medeni çärelerde Eýranyň, Russiýanyň, Özbegistanyň, Türkiýäniň we Tunisiň meşhur ýerine ýetirijileriniň çykyşlary bar.Baýramçylyk aýdym-sazly çykyşlaryň tapgyrlarynyň açylyşy 23-nji dekabrda eýranly türkmen rep aýdymçysy Emin Raseniň gatnaşmagynda geçiriljek konsert bilen başlanar. 24-nji dekabrda geçiriljek konsertde Özbegistanyň sazandasy Osman Nawruzow çykyş eder, 25-nji dekabrda bolsa türkiýeli aýdymçy Murat Boz türkmen tomaşaçylaryny öz ajaýyp aýdymlary bilen begendirer.
26-njy dekabrda Aşgabadyň ýaşaýjylary tunisli aýdymçy Amani Swissiň çykyşyna tomaşa edip, lezzet alyp bilerler. 27-nji dekabrda paýtagtymyzyň sport toplumynyň sahnasynda öz aýdymlarynyň awtory we ýerine ýetirijisi Arsen Şahuns çykyş eder. Baýramçylyk aýdym-sazly çykyşlaryň jemleýji güni 28-nji dekabrda geçiriljek konsertde türkiýeli aýdymçy Gülşen Baýraktar ajaýyp aýdymlary bilen çykyş eder.
Konsertler paýtagtymyzyň Gyşky görnüşleri boýunça sport toplumynda geçirilip, ol sagat 18:00-da başlanar. Giriş biletleriň bahasy 100 we 150 manat bolup, olary sport toplumynyň kassalaryndan satyn alyp bilersiňiz.