Aşgabatda Resul Gylyjowyň ýolbaşçylygyndaky Döwlet simfoniki orkestriniň konserti geçirildi. 24-nji iýunda Döwlet medeniýet merkeziniň Mukamlar köşgünde geçirilen aýdym-saz çäresine tomaşaçylar tarapyndan uly gyzyklanma bildirildi. Konserte Azatlyk Radiosynyň habarçysy hem bardy.
Köşgüň uly zalynda geçirilen "Müň bir gije" atly konsert çäresine biletler 50 manatdan satyldy. Ýörite adamlar tarapyndan satylan bu biletler köplenç tomaşaçylaryň öýlerine getirilip berildi.
"Aşgabatlylar konsertiň boljakdygyny we bu konserte biletleriň kimler tarapyndan satylýandygy barada tanyş-bilişleri arkaly bilip galdylar. Käbir tomaşaçylar biletleri satýan adamlar bilen öňünden ylalaşyp, biletleri konsert çäresiniň öňüsyrasynda, Mukamlar köşgüniň öňünde satyn aldylar. Biletleri köşgüň kassasynda satmadylar" diýip, habarçy gürrüň berdi.
Habarçymyz munuň anyk sebäbiniň belli däldigini aýtdy. Ýöne ol her niçik-de bolsa, aýdym-saz muşdaklarynyň konserte uly gyzyklanma bildirendigini, 1000 orunlyk uly zalyň tomaşaçydan dolandygyny belledi.
Konsert programmasy rus (Nikolaý Rimskiý-Korsakow), daniýaly (Karl Nielsen) we azerbaýjanly (Fikret Amirow) kompozitorlaryň "Müň bir gije" ertekiler ýygyndysyna esaslanyp, dürli döwürlerde döreden ajaýyp sazlaryny bir ýere jemledi.
"Müň bir gije" ertekileri orta asyrlar arap we pars edebiýatlarynyň ýadygärligi, eýran patyşasy Şähriýar bilen onuň aýaly Şährizada baradaky hekaýatlaryň ýygyndysydyr.
Eserler ýerine ýetirilmezden ozal, Resul Gylyjow tomaşaçylara olaryň mazmuny we mowzuklary barada gürrüň berdi.
Konsertiň başynda Nikolaý Rimskiý-Korsakow tarapyndan 1888-nji ýylda döredilen "Şährizada", "Deňiz we Sindbadyň gämisi" ýaly eserler ýaňlandy.
"Sungat işgärleriniň eserleri ussatlyk bilen ýerine ýetirmegi we zalyň akustikasynyň ajaýyplygy netijesinde, tomaşaçylar özlerini, hamana, tupanly ýa-da asuda deňziň ortasyndaky gämide ýaly duýdular. "Şährizada" eseri ýerine ýetirilende, käbir tomaşaçylar öz oňyn duýgularyny saklap bilmän, eserleriniň bölekleriniň arasyndaky arakesmelerde-de el çarpyşdylar" diýip, habarçy aýtdy.
"Şährizada" eseriniň käbir bölekleri amerikan, britan, rus we beýleki ýurtlaryň filmlerinde, şeýle-de käbir türk seriallarynda hem ulanyldy.
Soňra orkestr azerbaýjanly kompozitor Fikret Amirowyň “Müň bir gije” eserinden iki bölümi ýerine ýetirdi: “Bagdadyň bazary” we “Şähriýar we Şährizadanyň dueti”.
Konsertiň dowamynda daniýaly kompozitor Karl Nielseniň 1919-njy ýylda "Aladdin" pýesasyna ýazan eseri hem ýaňlandy.
"70 sazanda, köpüsi gaty ýaş, diňe bir "işlemek" bilen çäklenmän, aýdym-sazy duýup, ondan lezzet aldylar we tomaşaçylara özleriniň başarnyklaryny we zehinlerini görkezdiler" diýip, habarçy belledi.
Türkmenistanda, şol sanda paýtagt Aşgabatda koronawirus pandemiýasy bilen bagly aladalaryň arasynda girizilen karantin çäklendirmeleri sebäpli konsert çäreleriniň ençemesi yza tesdirilipdir. Şu ýylyň bahar paslyndan başlap gyş aýlarynda geçirilmegi planlaşdyrylan aýdym-saz çäreleri gaýtadan geçirilip başlandy.
Munuň bilen bagly, soňky iki aýa golaý wagtyň dowamynda paýtagtda azyndan bäş sany aýdym-saz çäresi geçirildi. Olaryň arasynda “Pariž, söýgim meniň!” we "Tango, Tango, Tango" atly konsertler bardy.
Hökümetçi "Türkmenportal" neşiri 8-nji iýulynda Aşgabatda ýene bir aýdym-saz çäresiniň, ýagny "Jaz we onuň töweregi" atly konsert geçiriljekdigini habar berýär. 26-njy iýunda çap edilen habarda konsertiň Mukamlar köşgünde geçiriljekdigi we onda Maýsa Nyýazowa we Döwran Şammyýew, Ilgiz Galimow (tenor-saksofon), Babaguly Goşaýew (truba), Döwran Gylyjow (trombon) ýaly aýdymçy-sazandalaryň çykyş etjekdigi aýdylýar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.