2024-nji ýylyň 26-27-nji noýabrynda Türkmenistanyň paýtagtynda Halkara ulag we üstaşyr geçelgeleri: özara baglanyşyk we ösüş (ITTC-2024) III Halkara maslahaty we sergisi geçiriler. Bu çäre Bütindünýä durnukly ulag gününe bagyşlanýar diýip, ittc-turkmenistan.com saýtynda habar berilýär.
Türkmenistanyň Ministrler Kabinetiniň ýanyndaky Ulag we kommunikasiýalar agentligi tarapyndan gurnalýan bu giň möçberli çäre dünýäniň 40 ýurdundan 600-den gowrak wekilleri bir ýere jemlär. Gatnaşyjylaryň arasynda demir ýol we logistika kompaniýalarynyň, howa gatnawlarynyň, ulag enjamlaryny öndürijileriň we döwlet düzgünleşdirijileriň wekilleri bolar.
Maslahatyň çäklerinde TAPI, Hazarüsti ugruň we ýokary tizlikli magistrallaryň ösdürilmegi ýaly sebitiň esasy infrastruktura taslamalary ara alnyp maslahatlaşylar. Şunda ýaşyl tehnologiýalaryň ornaşdyrylmagyna we ulag pudagynyň sanly özgerişlerine aýratyn üns berler.
Türkmenistanyň we Hytaýyň başlyklygynda Durnukly ulag boýunça dostlar toparynyň Ministrler duşuşygynyň geçirilmegi onuň Maksatnamasynyň möhüm bölegi bolar. Mundan başga-da, BMG-niň ýörite ilçisi Žan Todtyň ýolbaşçylygynda Hemmeler üçin howpsuz ýollar atly başlangyjy goldanar.
Maslahat bilen bir wagtda durnukly ulag we logistika babatynda täze işläp taýýarlamalary hödürlejek kompaniýalaryň gatnaşmagynda uly göwrümli sergi ýaýbaňlandyrylar.