Aşgabadyň Arçabil myhmanhanasynda 22-nji oktýabrda Garaşsyz Döwletleriň Arkalaşygyna agza ýurtlaryň weterinariýa boýunça Hökümetara geňeşiniň nobatdaky, 46-njy mejlisi geçirildi. "Türkmenistan" gazetiniň habar bermegine görä, mejlisiň dowamynda bu ugurda özara gatnaşyklaryň häzirki ýagdaýyna ser salnyp, ýakyn geljekde bilelikde ýerine ýetirilmeli işler ara alnyp maslahatlaşyldy.
Duşuşyga GDA agza ýurtlaryň weterinariýa boýunça Hökümetara geňeşiniň agzalary, Türkmenistanyň, Belarusuň, Gazagystanyň, Gyrgyzystanyň, Russiýa Federasiýasynyň, Täjigistanyň, Özbegistanyň oba hojalyk, maldarçylyk we weterinariýa boýunça ugurdaş edaralarynyň hem-de halkara guramalaryň wekilleri gatnaşdylar.
Mejlisde geňeşiň azyk howpsuzlygyny üpjün etmekde we oba hojalyk önümleri boýunça döwletara söwda gatnaşyklaryny ösdürmekde möhüm orun eýeleýändigi bellenildi. Geňeşiň agzalary haýwanlar bilen baglylykda döremegi mümkin bolan käbir keselleriň öňüni almak we olara garşy göreşmek boýunça GDA agza döwletleriň bilelikdäki çäreleriň toplumyny durmuşa geçirmek ugrunda alyp barýan işlerini ara alyp maslahatlaşdylar.
Mejlisiň barşynda oňa gatnaşyjylar milli, sebitleýin we halkara derejede degişli ulgamlarda ylalaşykly syýasaty durmuşa geçirmek, degişli döwlet strategiýalarynyň ýerine ýetirilişi babatda pikir alyşdylar.
Çykyşlarda ylmyň soňky gazananlaryny, haýwanlaryň ýokanç keselleriniň öňüni almak, anyklamak we bejermek bilen baglanyşykly innowasion işläp taýýarlamalary ulanmaga, bu ulgamda dünýäniň ösen ýurtlaryndaky toplanan tejribä, azyk önümleriniň howpsuzlygyny üpjün etmek ulgamlaryna aýratyn üns çekildi. Şunda çykyşlaryň her birinde degişli ugurlar boýunça hyzmatdaşlygy mundan beýläk-de pugtalandyrmagyň wajypdygy nygtaldy.
Mejlise gatnaşyjylar Türkmenistanda weterinariýa gulluklarynyň işini häzirki döwrüň talaplaryna laýyk derejede guramak we alyp barmak ugrunda edilýän tagallalara ýokary baha berdiler.
Duşuşygyň gün tertibinde geçirilen pikir alyşmalaryň netijelerine esaslanyp, geňeşiň agzalary GDA giňişliginde döwletara hyzmatdaşlygy çuňlaşdyrmak boýunça umumy tagallalara goşant goşmak barada ylalaşdylar. Mejlisiň ahyrynda GDA agza ýurtlaryň weterinariýa boýunça Hökümetara geňeşiniň indiki mejlisiniň geçiriljek ýeri kesgitlenildi.