25-nji maýda Aşgabadyň düýbüniň tutulmagynyň 140 ýyllygy bilen bagly baýramçylyk güni ilkinji dünýä inen körpeleriň ene-atalaryna prezident Berdimuhamedow sowgatlar gowşurdy diýip TDH döwlet täzelikler gullugy maglumat berdi.
Şol körpeler eneleriň we çagalaryň saglygyny goramak boýunça ylmy-kliniki merkezde dünýä indiler.
Selbi hem Yslam Orazmyradowlaryň maşgalasynda oglan we Aýna hem Ýazmuhammet Atajykowlaryň maşgalasynda gyz çaga dünýä indi. Körpeleriň ikisi-de maşgalasynda ilkinji perzent.
TDH-niň bellemegine görä, körpeleriniň dünýä inmeklerine sabyrsyzlyk bilen garaşýan maşgalalar prezidentiň öňe süren teklibini uly tolgunma bilen kabul etdiler.
Prezident 25-nji maý güni ilkinji doglan oglana Aşgabat ýa-da Paýtagt adyny, gyza bolsa, Merjen ýa-da Maýa adyny dakmagy teklip edipdi.
Bu paýtagta özboluşly söýginiň alamaty bolar diýip prezident nygtady. Oglanyň adyna Aşgabat we gyzyň adyna Merjen adyny dakdylar.
25-nji maý güni ilkinji doglan çagalara at bermegi prezident 26-njy fewralda teklip edipdi.
Şonda prezident “täze doglan körpelere sowgatlaryň gowşurylmagy olaryň ene-atalary üçin ýatdan çykmajak pursatlara öwürer” diýipdi.
Mundan soňra Baýramalynyň şäher bäbekhanasynyň lukmanlary we maşgala lukmanlary maýyň ikinji ýarymynda doguljak körpeler barada maglumatlary ýygnamaga başladylar.
Göwreliliginiň möhleti 6-7 aý bolan zenanlara ýörite enjam bilen 25-nji maý güni dogurmagy üçin “kömek” teklip edildi.
Lukmanlaryň ynandyrmagyna görä, maşgalalara sowgat üçin 1500 dollar beriler. Hatda, bu barada resmi taýdan yglan edilmedi.
Lukmanlar “öz hyzmaty” üçin 300 dollar sorapdyrlar.The post Aşgabat we Merjen atly maşgalasynyň ilkinji körpeleriniň ene-atalary prezidentden sowgat aldylar first appeared on Türkmenistanyň Hronikasy.