Paýtagtyň çagalar baglaryna gatnaýan körpeler üçin çykdajylar artýar. Çagalar baglarynda ene-atalardan resmi tölegden daşary talap edilýän zatlaryň sanawy giňeldilip, indi ýorgan-düşek getirmek hem soralýar.
Aşgabadyň çagalar baglaryna gatnaýan çagalaryň ene-atalary öz çagalary üçin ýatmaga gerekli ýorgan, düşek, ýassyk daşyny öz şahsy hasabyna satyn alyp getirmelidigini bilip galypdyr.
Azatlygyň habarçysy bu talabyň tomusky dynç alyşdan soň çagalaryny çagalar bagyna taýýarlaýan ene-atalar üçin garaşylmadyk täzelik bolandygyny aýdyp, ozal çagalar bagynda talap edilen zatlaryň sanawynyň esasan arassaçylyk önümlerinden düzülendigini belledi.
"Mundan öň çagalar bagyna gatnaýan körpeler üçin gap-çanak ýuwujy serişdesini, suwuk sabyn, el süpürmek üçin gury we öl salfetkalar we hajathana kagyzy ýaly zatlary satyn alyp getirmek çagalaryň ene-atasynyň üstüne ýüklenýärdi. Indi ýatmak üçin gerekli serişdeler hem çagalaryň hossarlarynyň üstüne ýüklendi" diýip, habarçy 16-njy awgustda Aşgabatdan habar berdi.
Azatlyk bilen gürleşen ene-atalar bu täze talapdan nägile bolýarlar we dilden edilýän talaplaryň gitdigiçe artýandygyny aýdýarlar.
Çagalar baglarynyň işgärleri bolsa, döwlet tarapyndan maddy üpjünçiligiň örän gowşakdygyny aýdarlar.
Paýtagtyň çagalar baglarynyň biriniň müdiri Azatlyk bilen anonimlik şertinde gürrüňdeş bolup, bakjanyň maddy-tehniki üpjünçiliginiň örän gözgyny hala düşendigini gürrüň berdi.
"Bilim müdirligi tarapyndan berilýän zatlar çäkli.Galam, A4 kagyz, tam süpürijiler üçin rezin ellik, Aşgabadyň töwereginde işleýän dokma fabriginiň öndürýän önümlerinden galyndy mata bölekleri ýaly zatlardan başgasy berilmeýär. Çagalar bagyna bolsa ýorgan-düşek, ýassyk, ýuwujy serişdeler, el süpürmek üçin kagyz, salfetkalar we ýene ençeme zat gerek. Şonuň üçin zerur esbaplary, serişdeleri we enjamlary edinmek üçin terbiýeçiler çagalaryň hossarlaryndan soramaly bolýarlar" diýip, çagalar bagynyň müdiri aýdýar.
Habarçylara görä, bu ýagdaý paýtagtyň çagalar baglarynyň köpüsine degişli.
Aşgabatly enäniň sözlerine görä, her bir çaga üçin soralýan zatlary satyn alyp çagalar bagyna eltip bermek üçin bir aýlyk çykdajylar şu çaka çenli 200 manada ýetipdir. (Merkezi Bankyň kursy boýunça bu 57 dollar çemesi-red.)
Çagalar baglarynda körpeleriň ene-atalaryndan el süpüriji we hajathana kagyzy ýaly arassaçylyk serişdelerini tabşyrmagyň soralmagy mundan birnäçe ýyl ozal başlanypdy.Azatlygyň habarçylary Aşgabadyň çagalar baglarynda ene-atalardan gap-gaç, el we kir ýuwujy serişdeleri hem-de hajathana kagyzlary ýaly senagat harytlaryny getirmegiň yzygiderli talap edilýändigini 2019-njy ýylda habar beripdi.
Ondan öň şeýle talaplar käwagt duş gelýärdi. Şol döwürde ene-atalardan çagalar baglaryndaky ýassyk we ýorgan-düşek daşlaryny öýlerinde ýuwup getirmek hem talap edilipdi.
Türkmenistanda çagalar baglarynyň resmi tölegi 2017-nji ýylyň oktýabrynda ýokarlandyrylypdy. Şonda 10 esse töweregi artdyrylan töleg 80 manada çykypdy.
Çaglar baglaryndaky ýaramaz şertler ene-atalary öňem alada goýýardy. Ene-atalar mekdebe çenli bilim edaralarynda terbiýeçilik işleriniň hiliniň pesliginden, hem-de iýmit üpjünçiliginiň ýagdaýynyň we arassaçylyk şertleriniň ýaramazlygyny Azatlyga gürrüň beripdi.
Döwlet metbugatynda çagalar baglaryna degişli wagtal-wagtal çap edilýän maglumatlarda täze bakçalaryň açylýandygy habar berilýär.
Türkmenistanda çagalar baglary bilen bagly problemalary resmi derejede agzamaýan häkimiýetler çagalar baglaryna gatnaýan körpeleriň sanyny artdyrmaga synanyşýarlar. Şu maksatly ozalky ýyllarda çagalaryň mekdebe ýazylmagy üçin olaryň çagalar bagyna gatnandygy hakynda resminamasynyň bolmagy talap edilipdi.
Türkmenistanda çagalar baglaryna gatnaýan körpeleriň sany barada resmi maglumat çap edilmeýär. BMG-niň ilat gaznasynyň we çagalar gaznasynyň Türkmenistanyň Statistika baradaky döwlet komiteti bilen bilelikde 2020-nji ýylyň iýunynda çap eden hasabatynda Türkmenistanda 3-5 ýaş aralygyndaky çagalaryň 40%-niň çagalar bagyna gatnaýandygy aýdylypdy.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.