UEFA Çempionlar Ligasynda “B” toparçada “Lansyň” derwezesinden jogapsyz 6 gol geçiren “Arsenal” 1/8 finala adyny ýazdyrdy. “Arsenalyň” 6 goluny 6 futbolçy geçirip, londonlylar 1-nji ýarymda 5 gezek tapawutlandy. Arsenal 6 ýyldan soň gatnaşýan ýaryşynda 17-nji gezek toparçalardan çykmagy başardy.
Çekeleşikli geçen oýunda “Sewilýa” öz meýdançasynda PSW toparyny kabul etdi.Ispan kluby Ramos hem-de En-Nesiriniň gollary bilen 2-0 öňe saýlandy. Ýöne 66-njy minutda Okamposyň 2-nji sarydan soň gyzyl almagy, duşuşykdaky ähli hasaplary üýtgetdi. 68-nji minutda Salibariniň ajaýyp goly bilen umytlanan myhmanlar 81-nji minutda Gudeliň awtogoly esasynda hasaby deňledi. 90+2-nji minutda-da Pepiniň geçiren goly eýndhowenlileriň 1/8 finala çykmagy üçin ýeterlik boldy.
Olar 4 ýyldan soň gatnaşýan ýaryşynda 5-nji gezek 1/8 finala çykdy.PSW topary soňky gezek 2015/16 möwsüminde 2-nji tapgyrda oýnapdy.
“C” toparçada “Real Madrid” öz meýdançasynda “Napoliden” 4-2 hasabynda üstün çykdy. Duşuşykda ispan klubunyň gollaryny Rodrigo, Bellingam, Paz hem-de Hoselu geçirdi. Ilkinji bolup hasaby açan “Napoli” toparynyň adyndanam Simeone bilen Zambo Anguissa tapawutlandy.
“Braga” bilen “Union Berlin” toparlarynyň arasyndaky duşuşykda ýeňiş gazanan bolmady. Duşuşykda nemes kluby 42-nji minutda Gosensiň goly bilen 1-0 öňe geçse-de, 31-nji minutda 1 oýunçy kem galan “Braga” 51-nji minutdaky Džalonyň goly esasynda hasaby deňledi. “Braga” soňky duşuşykda “Napolini” 2 gol aratapawudy bilen ýeňse, 1/8 finala çykar.
“D” toparçadaky duşuşyklar hem edil “A” toparçadaky ýaly birmeňzeş hasaplar bilen tamamlandy. “Real Sosiedad” bilen “Red Bull Salsburgyň” arasyndaky oýunda hasap açylmady.Portugaliýada geçirilen duşuşykda “Benfika” 1-nji ýarymda “Interiň” derwezesinden 3 gol geçirdi.
Gollaryň 3-sini hem 2016-2019-njy ýyllarda 3 möwsüm “Interde” çykyş eden Žoao Mario öz adyna ýazdyrdy. Ýöne onuň bu het-trigi ýeňşe ýeterlik bolmady. 2-nji ýarymda erjel oýun görkezen “Inter” tejribeli oýunçylarynyň gollary bilen hasaby deňläp, ýeňlişden halas boldy. “Intere” 1 utuk gazandyran gollary Arnautowiç, Frattesi hem-de Aleksis Sançes (p) geçirdi.