Arkadag topary BAE-de geçirilýän okuw-türgenleşik ýygnanyşygynyň çäginde nobatdaky ýoldaşlyk duşuşygynda ýeňiş gazandy. Wladimir Baýramowyň şägirtleri Gyrgyzystanyň häzirki çempiony we ýurduň Superkubogynyň eýesi Abdyş-Ata klubyny 2:1 hasabynda ýeňlişe sezewar etdiler.
Ýeri gelende bellesek, futbol boýunça Türkmenistanyň milli ýygyndysynyň özenini düzýän Arkadag futbol kluby 2023-nji ýylyň aprel aýynda esaslandyrylyp, ol debýut möwsüminde Türkmenistanyň çempiony boldy hem-de ýurduň Kubogyny eýelemegi başardy.
4-nji martda başlanjak Türkmenistanyň çempionatynyň täze möwsümine taýýarlyk görýän Arkadag kluby 6 sany ýoldaşlyk duşuşygyny geçirdi.
Arkadag topary Türkiýäniň Antalýa şäherinde geçirilen okuw-türgenleşik ýygnanyşygynda Demirgazyk Makedoniýanyň Wardar toparyny 1:0 hasabynda ýeňlişe sezewar etdi hem-de Ukrainanyň Şahtýor toparyndan 1:4, Dnepr-1 toparyndan bolsa 0:1 hasabynda asgyn geldi.
BAE-niň Abu-Dabi şäherinde geçirilen ikinji okuw-türgenleşik ýygnanyşygynda bolsa Russiýanyň Premýer-ligasynda çykyş edýän Pari NN toparyny 2:1 hasabynda ýeňdi hem-de RPL-iň häzirki çempiony Zenit bilen 1:1 hasabynda deň oýnady.