Dünýä Kubogy 2026-nyň saýlama duşuşyklarynyň çäginde Günorta Amerika zolagynda 11-nji duşuşyklaryň 3-si geçirlip, 2-si şu gije oýnalar.Geçirilen oýunlarda sanawyň lideri Argentinanyň ýygyndysy myhmançylykda Paragwaýdan 2-1 hasabynda asgyn geldi. 11-nji minutda Lautara Martinesiň goly bilen öňe geçen argentinleriň derwezesinden hasaby deňlän goly 19-njy minutda Toni Sanabriýa geçirdi. 2-nji ýarymyň başynda-da, has takygy, 47-nji minutda Federiko Alderete ýer eýelerini öňe çykardy.
Bu duşuşykdaky soňky gol bolup, Paragwaýyň ýygyndysy 2-1 hasabynda ýeňşini baýram etdi.Bu Dünýä Kubogynyň häzirki eýesi Argentinanyň 3-nji ýeňlişi bolup, olar öz meýdançasynda Urugwaýdan, myhmançylykda-da Kolumbiýadan asgyn gelipdi.
Argentinanyň indiki duşuşygy 19-njy noýabrda Peru bilen bolar.
Yzygiderli ýeňişler gazanmakda kynçylyk çekýän Braziliýanyň ýygyndysy ýene-de 3 utuk alyp bilmedi.Myhmançylykda Wenesuela bilen duşuşan Braziliýanyň ýygyndysy 1-1 hasabynda deňme-deň oýnady. 43-nji minutda 10-njy belginiň täze eýesi Rafinýa owadan gol bilen hasaby açdy. Ýöne brazilleriň bu goluna wenesuelalylaryň jogaby gijikmedi. Ýer eýeleri 2-nji ýaryma gol bilen başlap, 46-njy minutda Telasko Segowiýa hasaby deňledi.
Oýnuň 62-nji minutynda Braziliýanyň ýyldyzy Winisius Junior penaltini dürs urup bilmedi.Duşuşygyň 89-njy minutynda bolsa Wenesueladan Aleksander Gonzales gyzyl kart aldy.
Ekwador bolsa öz meýdançasynda Boliwiýany Walensiýanyň (26 p), Platanyň (28, 49) hem-de Mindanyň (61) gollary bilen 4-0 hasabynda ýeňdi.
Şu gije 11-nji tapgyryň çäginde Urugwaý Kolumbiýa hem-de Peru Çili duşuşyklary oýnalar.