Türkmen agyr atletikaçysy Anamjan Rustamowa Daşkentde geçirilýän agyr atletika boýunça Aziýa çempionatynda 81 kilograma çenli agram derejesinde bürünç medala mynasyp boldy.
A.Rustamowa silterläp götermekde 105 kilogram netije bilen ýer eýeleriniň wekili Rigina Adaşbaýewadan (107 kg) hem-de koreýaly Kim Suhýundan (110 kg) soňra üçünji orny eýeledi. Ýöne gynansakda, A.Rustamowa itekläp götermekde üç synanyşygyň hiç birini şowly tamamlap bilmedi. Netijede, ol kiçi bürünç medal bilen çäklenmeli boldy.
Ozal habar berşimiz ýaly, Daşkentde geçirilýän agyr atletika boýunça Aziýa çempionaty 3-nji fewralda başlandy. Ýaryş 10-njy fewrala çenli dowam eder. Turnire yklymyň 34 ýurduna wekiliçilik edýän türgenleriň 239 sanysy gatnaşýar.
Ýaryşda erkekleriň we zenanlaryň arasynda 10 agram derejesinde medallar ugrunda göreşilýär. Agyr atletika boýunça Aziýa çempionatynda 2024-nji ýylda Parižde geçiriljek Olimpiýa oýunlaryna gatnaşmaga hukuk berýän reýting utuklary ugrunda-da bäsleşilýär.