Dünýäniň iň gadymy film festiwaly bolan Wenesiýa kino şüweleňi tamamlandy. 79-njy gezek geçirilen festiwalda baş baýrak amerikaly zenan režissýor Lora Poýtrasyň “Ähli gözellikler we gan döküşikler” atly dokumental filmine gowşuryldy.
Ady agzalan bu ekran eseri Wenesiýa film festiwalynda “Altyn ýolbars” baýragyny gazanan 2-nji dokumental kino hökmünde taryha girdi.Amerikaly fotosuratçy zenan Nan Goldingiň durmuşy barada söhbet açýan bu kinodan öň 2013-nji ýylda Janfranko Rosiniň “Sacro GRA” atly dokumental filmi “Altyn ýolbars” baýragyna mynasyp bolupdy.
Festiwalyň iň uly 2-nji sylagy Eminleriň “Gran Pri” baýragyna fransiýaly zenan režissýor Alis Diopyň “Sent-Omer” atly filmi laýyk görüldi.Italiýaly meşhur režissýor Luka Guadinýino “Süňkler we hemmesi” atly filmi üçin Kümüş ýolbars iň gowy režissýor baýragy bilen sylaglandy.
Eminleriň ýörite baýragy bolsa “Aýylar ýok” filmi üçin eýranly belli režissýor Jafar Panahä berildi.Irlandiýaly režissýor Martin MakDonahyň ssenarisini ýazyp, surata düşüren “Inşeriniň perisi” atly gara-komediýa görnüşli filminiň edebi esasy iň gowy ssenariý diýlip saýlandy.
Bu filmde baş keşpleriň birini janlandyran Kolin Farrell iň gowy aktýor baýragyna mynasyp boldy.Iň gowy aktrisa baýragyna berilýän “Volpi” kubogy oskarly Keýt Blanşette gowşuryldy.Ussat aktrisa “Tar” filmindäki keşbi üçin bu baýraga laýyk görüldi.
Marçello Mastroianni adyndaky iň ýaş artist baýragyna “Süňkler we hemmesi” filminiň aktrisasy Teýlor Rassell mynasyp boldy.
79-njy Wenesiýa film festiwalynyň ýeňijileri:
Altyn ýolbars baýragy: Ähli gözellikler we gan döküşikler (All the Beauty and the Bloodshed) Lora Poýtras
Eminleriň Gran Pri baýragy: Sent-Omer (Saint Omer) Alis Diop
Kümüş ýolbars iň gowy režissýor baýragy: Luka Guadinino Süňkler we hemmesi (Bones & All)
Eminleriň ýörite baýragy: Aýylar ýok (Khers Nist) Jafar Panahi
Iň gowy ssenariý: Inşireniň perisi (The Banshees of Inisherin) Martin MakDona
Iň gowy aktýor Volpi kubogy: Kolin Farrell Inşireniň perisi (The Banshees of Inisherin)
Iň gowy aktrisa Volpi kubogy: Keýt Blanşett Tar (Tar)
Marçello Mastroianni adyndaky iň ýaş artist baýragy: Teýlor Rassell Süňkler we hemmesi (Bones & All)