23 — 28-nji iýun aralygynda Albaniýa Respublikasynyň Tirana şäherinde Ýaşlaryň 27-nji Balkan matematika olimpiadasy geçirildi. Bu abraýly halkara bäsleşige Türkmenistandan zehinli mekdep okuwçylarynyň 6-sy — Aşgabat şäheriniň matematika we iňlis dili okuw derslerini çuňlaşdyrylyp öwredýän ýöriteleşdirilen 49-njy orta mekdebinden iki okuwçy,
Aşgabat şäheriniň iňlis dili, himiýa we biologiýa derslerini çuňlaşdyrylyp öwredilýän ýöriteleşdirilen 86-njy orta mekdebinden üç okuwçy, Aşgabat şäheriniň iňlis dili çuňlaşdyrylyp öwredilýän ýöriteleşdirilen 135-nji orta mekdebinden bir okuwçy gatnaşdy.
Mekdep okuwçylaryndan saýlanan topara Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň matematika mugallymy Arslan Hojiýew bilen Gujurly Bilim Merkezi hojalyk jemgyýetiniň bilim bölüminiň matematika mugallymy Pälwan Agamyradow dagy ýolbaşçylyk etdi.
Bu bäsleşige 18 döwletden jemi 106 sany okuwçy gatnaşdy. Halkara bäsleşikde Rumyniýa, Täjigistan, Gazagystan, Serbiýa, Bolgariýa, Demirgazyk Makedoniýa, Türkiýe, Fransiýa döwletleriniň zehinli okuwçylary özaralarynda güýç synanyşdylar.
Netijede Aşgabat şäheriniň matematika we iňlis dili okuw derslerini çuňlaşdyrylyp öwredýän ýöriteleşdirilen 49-njy orta mekdebiniň 9-njy synp okuwçysy Begenç Akmyradow, Aşgabat şäheriniň iňlis dili, himiýa we biologiýa derslerini çuňlaşdyrylyp öwredilýän ýöriteleşdirilen 86-njy orta mekdebiniň 9-njy synp okuwçysy Mälikşa Meýlismyradow kümüş medallara mynasyp boldular.
Aşgabat şäheriniň matematika we iňlis dili okuw derslerini çuňlaşdyrylyp öwredýän ýöriteleşdirilen 49-njy orta mekdebiniň 9-njy synp okuwçysy Söýünmuhammet Geldimämmedow, Aşgabat şäheriniň iňlis dili, himiýa we biologiýa derslerini çuňlaşdyrylyp öwredilýän ýöriteleşdirilen 86-njy orta mekdebiniň 9-njy synp okuwçylary Begli Işanmyradow we Kümüş Nobatowa, Aşgabat şäheriniň iňlis dili çuňlaşdyrylyp öwredilýän ýöriteleşdirilen 135-nji orta mekdebiniň 9-njy okuwçysy Selim Hommatdurdyýew bürünç medallary eýelediler.