Dohadaky (Katar) Al-Tumama stadionynda AFK Çempionlar ligasynyň Günbatar zolagyndaky ýarym final oýny geçirildi. Onda Saud Arabystanynyň Al-Hilal topary Kataryň Al-Duhaýl kluby bilen güýç synanyşdy.
Duşuşyk 7:0 hasabynda Al-Hilalyň ýeňşi bilen tamamlandy.
Şeýlelikde, Al-Hilal finalda Ýaponiýanyň Urawa Red Daýmonds kluby bilen baş baýrak ugrunda göreşer. Ýapon topary ýarym finaly oýnuny 2022-nji ýylyň awgustynda geçirip, Çýonbuk Hýundai Motors toparyny ýaryşdan çykarypdy. Ýaponiýadaky Saýtama 2002 stadionynda geçirilen şol oýnuň esasy we goşmaça wagty 2:2 hasabynda deňlikde tamamlanyp, oýundan soňky penaltiler boýunça ýaponlar 4:3 hasabynda ýeňiş gazanypdylar.
Ýeri gelende bellesek, AFK Çempionlar ligasynyň şu möwsüminde final iki oýundan ybarat bolar. Bir ýyl mundan ozal başlanan ýaryşyň ýeňijisi 2023-nji ýylyň baharynyň ahyrynda kesgitleniler. Final duşuşyklary 2023-nji ýylyň 29-njy aprel hem-de 6-njy maý senelerinde bolup geçer. Finalyň deslapky oýny Günbatar zolagyň, jogap duşuşygy bolsa Gündogar zolagyň wekiliniň meýdançasynda geçiriler.
AFK Çempionlar ligasynyň şu wagtky çempiony Saud Arabystanynyň Al-Hilal toparydyr.