Ahal futbol kluby AFK Çempionlar ligasyndaky öý duşuşyklary üçin köpçülikleýin habar beriş serişdeleriniň wekilleriniň akkreditasiýasynyň başlanandygyny mälim etdi. Akkreditasiýa 15-nji sentýabra çenli dowam eder diýlip, toparyň metbugat gullugynyň habarynda bellenilýär.
Akkreditasiýa üçin ýüz tutýan köpçülikleýin habar beriş serişdeleriniň wekilleri habar beriş serişdesiniň ady, žurnalistiň ady, familiýasy we atasynyň ady görkezilen haty toparyň metbugat gullugyna (official@ahal-fc.com) ibermelidir. Şeýle-de hatyň ýany bilen 3×4 surat hem goşulmaly. Görkezilen seneden giç ugradylan ýüztutmalar hasaba alynmaz.
Ýeri gelende bellesek, 2023/24-nji ýyllaryň futbol möwsüminde Ahal AFK Çempionlar ligasynda Türkmenistana wekilçilik eder. Serdar Geldiýewiň tälim berýän topary Özbegistanyň Pahtakory, Saud Arabystanynyň Al-Feýhasy hem-de Birleşen Arap Emirlikleriniň Al-Aýny bilen birlikde A toparçada çykyş eder. Ahal turnirdäki ilkinji öý oýnuny 19-njy sentýabrda Al-Feýha bilen geçirer.a