Ahal welaýatynyň mekdep okuwçylary Russiýa Federasiýasynyň Saratow şäherindäki N.G.Çernyşewskiý adyndaky Saratow Milli gözleg döwlet uniwersitetiniň Kompýuter howpsuzlygy we kriptografiýa nazary esaslary bölümi hem-de Informatika we maglumat tehnologiýalary fakulteti tarapyndan kriptografiýa dersi boýunça geçirilýän ХХ açyk olimpiadasynyň birinji tapgyrynda üstünlikli çykyş edip, nobatdaky tapgyra gatnaşmaga hukuk gazandylar.
Täze ýyl baýramçylygynyň öňüsyrasynda Russiýa Federasiýasyndaky agzalan ýokary okuw mekdebinden gelip gowşan bu şatlykly habar zehinli ýaşlarymyzyň üstünligini aýdyňlygy bilen äşgär edýär hem-de Gahryman Arkadagymyz tarapyndan bilim ulgamynda amala aşyrylýan özgertmeleriň oňyn netije berýändigini dabaralandyrýar.
Kriptografiýa dersi boýunça geçirilýän ХХ açyk olimpiada iki tapgyrdan ybaratdyr. Onuň birinji tapgyry şu ýylyň 6 — 12-nji dekabr aralygynda onlaýn tertipde geçirilip, oňa birnäçe döwletiň ýokary okuw we orta mekdeplerinden talyplardyr okuwçy ýaşlar gatnaşdy. Açyk olimpiadanyň bu tapgyryna Ak bugdaý we Kaka etraplaryndan okuwçy ýaşlar gatnaşyp, kriptografiýa dersi boýunça zehin-başarnygyny görkezdiler.
Ýeri gelende, ýaşlarymyzyň bu açyk olimpiada Ak bugdaý etrabyndaky takyk we iňlis dili derslerini çuňlaşdyryp öwredýän ýöriteleşdirilen 27-nji orta mekdepden, Kaka etrabyndaky takyk ugurlary boýunça ýöriteleşdirilen 21-nji orta mekdepden, şol etrapdaky daşary ýurt dillerini çuňlaşdyryp öwredýän ýöriteleşdirilen 17-nji orta mekdepden, 18-nji orta mekdepden onlaýn tertipde gatnaşandygyny bellemelidiris.
Gürrüňi edilýän olimpiada 6 — 8-nji synplaryň, 9 — 11-nji synplaryň arasynda aýratynlykda geçdi. Onuň netijesinde Ak bugdaý we Kaka etraplarynyň ýöriteleşdirilen orta mekdeplerinden gatnaşan okuwçylaryň 16-sy aýratynlykda üçünji orna eýe bolup, umumylykda ikinji tapgyra gatnaşmaga hukuk gazandylar. Onda Russiýa Federasiýasyndan mekdep okuwçylary birinji, Moldowa Respublikasynyň mekdep okuwçylary umumylykda ikinji orna eýe boldular.
Açyk olimpiadanyň ikinji tapgyry geljek ýylyň 30-njy ýanwarynda onlaýn tertipde geçiriler.