Ahalyň futbolçylary AFK-nyň Çempionlar ligasynda BAE-niň Şabab Al-Ahli topary bilen boljak duşuşykda öňki türgenleşigini geçirdi.
AFK-nyň Çempionlar ligasynyň Günbatar sebitiniň toparçalaýyn tapgyrynyň duşuşyklary şu ýyl Saud Arabystanynda geçirilýär. Mukaddes Oraza aýynyň dowam edýänligi sebäpli, kabul ediji döwletiň Hökümeti yklym ýaryşynyň duşuşyklaryny giçki wagta aldy. Şeýlelikde, Ahalyň AFK-nyň Çempionlar ligasyndaky ilkinji duşuşygy 8-nji aprel güni gije sagat 01:15-de başlanar.
Şabab Al-Ahli Birleşen Arap Emirlikleriniň iň üstünlikli toparlarynyň biridir.Topar 7 gezek ― 1974/75, 1975/76, 1979/80, 2005/06, 2008/09, 2013/14, 2015/16-njy ýyllaryň möwsümlerinde ýurduň çempiony boldy. Şeýle hem Şabab Al-Ahli 10 gezek (1975, 1977, 1988, 1996, 2002, 2004, 2008, 2013, 2019, 2021) BAE-niň Prezidentiniň kubogyny gazandy.
Topar ýurduň liga kubogynyň 5 (2012, 2014, 2017, 2019, 2021) we Naýbaşy kubogynyň hem 5 (2009, 2013, 2014, 2016, 2020) gezek eýesidir.
Şabab Al-Ahli AFK-nyň Çempionlar ligasynda 2015-nji ýylda finala çenli baryp ýetdi, ýöne finalda Hytaýyň Guançžou Ewergrandyndan 0:1 hasabynda asgyn geldi.
Ahal ikinji tapgyrdaky duşuşygyny 11-nji aprelde Kataryň Al-Garafa, üçünji tapgyrda bolsa 14-nji aprelde Eýranyň Fulad topary bilen geçirer.
C toparçanyň wekilleri 18 ― 27-nji aprel aralygynda ýene bir aýlawda duşuşyklary geçirerler.
Ýaryşyň 1/8 finalyna 10 toparçanyň ýeňijileri we ikinji orny eýelänleriň 6-sy gatnaşar. Olaryň 3-si Günbatar, ýene şonçasy Gündogar sebite degişli bolar.