Türkmenistanyň Merw we Gyrgyz Respublikasynyň Alaý futbol toparlarynyň arasynda AFK-nyň kubogy ― 2023/24-iň saýlama duşuşygynyň geçiriljek ýeri belli boldy.
Toparlar 15-nji awgust güni Mary şäherindäki 10 müň orunlyk Sport toplumynda duşuşarlar. Bu barada AFK-nyň resmi saýty habar berýär.
Bu duşuşygyň ýeňijisi ýaryşyň pleý-off tapgyrynda Täjigistanyň Hujand topary bilen duşuşar. Şol duşuşyk 22-nji awgustda Hujand şäherindäki Täjigistanyň Garaşsyzlygynyň 20 ýyllygy stadionynda geçiriler. AFK-nyň saýlama duşuşygyndaky göreşiň bir duşuşykdan geçirilýändigini ýatladýarys.
Eger Merw iki duşuşykdan hem üstünlikli geçip bilse, ýaryşyň Merkezi sebitinde Täjigistanyň Rawşany, Türkmenistanyň Altyn asyry we Gyrgyzystanyň Abdyş-Atasy bilen bir toparçada ýaryşar.
Ýaryşyň toparçalaýyn tapgyryna 20-nji sentýabrda badalga berler. Ondan soňky tapgyra bolsa diňe toparçanyň ýeňijisi geçip biler.