AFK Çempionlar Ligasynda toparçalardaky 4-nji duşuşyklar geçirilip, 2 klub 1/8 finalyna çykmaga hukuk gazandy.AFK Çempionlar Ligasynda her toparçadan 1-nji orny eýelänler bilen 2-nji ýeri alanlaryň iň gowy 6-sy ýaryşy (her sebitden 3-si) dowam etdirer. Ýagny 2-nji ýeri eýelänleriň 3-si Gündogar sebitindäki “A”, “B”, “C”, “D”, “E” toparçalardan, galan 3-si bolsa Günbatar sebitindäki “F”, “G”, “H”, “I”, “J”, toparçalardan 1/8 finala çykarlar.
“A” toparçada ýurdumyzyň adyndan wekilçilik edýän “Ahal” topary Aşgabatda Özbegistanyň “Pahtakor” topary bilen duşuşdy. Çekeleşikli geçen oýun 1-1 hasabynda deňlikde tamamlandy. 81-nji minutda minutda Alibek Abdyrahmanowyň goly bilen öňe geçen ildeşlerimiziň derwezesinden hasaby deňlän goly 90+5-nji minutda Hojimat Erkinow geçirdi.
Toparçadaky beýleki duşuşykda BAE-niň “Al-Ain” topary myhmançylykda Saud Arabystanynyň “Al-Feýha” toparyny Labanyň (29, 40) hem-de Rahiminiň (64) gollary bilen 3-2 hasabynda ýeňdi.Bu ýeňişden soň utugyny 12-ä çykaran “Al-Ain” topary 1/8 finala çykan ilkinji topar boldy.
“C” toparçada Eýranyň “Sepahan” topary öz meýdançasynda Özbegistanyň AGMK toparyny 9-0 hasabynda ýeňdi. Duşuşykda Hosseinnejad bilen Alekasir 2 gol geçirdi. Myhmançylykda Yragyň “Al-Kuwa Al-Jawiýa” toparyndan 2-0 asgyn gelen Saud Arabystanynyň “Al-Ittihad” topary portugaliýaly tälimçisi Nunu Espiritony wezipesinden boşatdy. Toparçada “Al-Ittihad” 9 utuk bilen 1-nji orunda barýar.
“D” toparçada “Al Hilal” (S.Arabystany) bilen “Nawbahor” (Özbegistan) degişlilikde, Hindistanyň “Mumbaý Siti” toparyny (2-0) hem-de Eýranyň “Nassaji Mazandaran” (3-1) toparyny myhmançylykda-da ýeňmegi başardylar. “E” toparçada Ronaldonyň çykyş etmedik duşuşygynda “Al Nassr” myhmançylykda Kataryň “Al-Duhail” toparyny 3-2 hasabynda ýeňlişe sezewar etdi.
Duşuşykdaky gollary braziliýaly 2 futbolçy geçirip, “Al Nassryň” adyndan Talişka (27, 37, 65), ýer eýeleri “Al-Duhailiň” adyndanam Koutinio (8, 80 p) tapawutlandy. “Istiklol” bilen “Persepolis” toparlary-da utuklary paýlaşdylar (1-1).
“I” toparçada Ýaponiýanyň “Kawasaki Frontal” topary öz meýdançasynda Tailandyň “PG Pathum Ýunaýted” toparyny 4-2 ýeňip, utugyny 12-ä çykardy.Olara toparçada 1-nji orny eýelemek üçin 1 utuk ýeterlik bolar. “J” toparçada ýeňlişsiz barýan “Phohan Stilers” öz meýdançasynda Ýaponiýanyň “Urawa Red Daýmonds” klubundan Zeka hem-de Kim In-Sunuň gollary bilen 2-1 üstün çykyp, utugyny 12-ä ýetirdi. Şunlukda, “Phohan Stilers” 1/8 finala adyny ýazdyran 2-nji klub boldy. Şeýle-de, “F” toparçada “Bangkok Ýunaýtediň” 1/8 finala çykmagyna bir ädim galdy.