1. Türkmenistandaky Änew şäheri türki dünýäsiniň 2024-nji ýyldaky medeni paýtagty diýlip saýlanyldy. Şeýle çözgüt Bursadaky TÜRKSOÝ-a agza ýurtlaryň medeniýet ministrleriniň hemişelik geňeşiniň 39-njy mejlisiniň dowamynda kabul edildi. TÜRKSOÝ-yň geňeşiniň mejlisine medeniýet ministri Atageldi Şamyradowyň ýolbaşçylygyndaky Türkmenistanyň wekiliýeti hem gatnaşýar.
2. Hormatly Prezidentimiz Serdar Berdimuhamedow şu ýylyň noýabr aýynda Birleşen Arap Emirliklerine barar. Saparyň guramaçylyk meseleleri Türkmenistanyň daşary işler ministriniň orunbasary Berdinyýaz Mätiýew bilen BAE-niň ilçisi Ahmed Al-Haý Al-Hameliniň arasynda geçirilen duşuşygyň çäklerinde ara alnyp maslahatlaşyldy.
3. 2022-nji ýylyň 7-nji noýabryndan başlap, daşary ýurtly we türkmen awtoulag serişdeleriniň sürüjilerine Türkmenistanyň çägine girmäge, ondan çykmaga we üstaşyr geçmäge rugsat berler. Ýük ulaglary üçin 10 sany awtoulag goýberiş nokady açylar. Ýurduň çägine girmäge we çykmaga Eýran, Gazagystan, Özbegistan we Owganystan bilen döwlet serhediniň serhet geçelgelerinde rugsat berilýär.
4. Turkish Airlines awiakompaniýasy noýabr aýynda Aşgabat Stambul ugry boýunça dört ýolagçy uçuşyny amala aşyrar. Uçuşlar 2022-nji ýylyň 14, 19, 21 we 26-njy noýabrynda amala aşyrylar. Turkish Airlines-iň uçarlary Aşgabatdan sagat 18:45-de asmana galarlar we sagat 20:55-de Stambulyň howa menziline gonarlar.
5. Türkmenistanda hormatly Prezidentimiz Serdar Berdimuhamedowyň gatnaşmagynda Milli tokaý maksatnamasyny durmuşa geçirmegiň çäklerinde ählihalk bag ekmek dabarasynyň güýzki möwsümine badalga berildi. Döwlet Baştutanymyzyň Kararyna laýyklykda, şu ýylda ýurdumyzda saýaly, pürli, miweli agaçlaryň we üzüm nahallarynyň 3 million düýbüni, şol sanda ministrlikler, pudaklaýyn dolandyryş edaralary, şeýle hem paýtagtymyzyň häkimligi tarapyndan olaryň 1,5 million düýbüni ekmek bellenildi.
6. Dünýäniň iň uzyn zenany, türkiýeli Rumeýsa Gelgi ömründe ilkinji gezek uçarda syýahat etdi. Seýrek genetiki kesel örän çalt ösüşe sezewar edýän Uiwer sindromy sebäpli Rumeýsa köplenç nosilkada ýa-da inwalid arabasynda hereket etmäge mejburdyr, emma käwagt ol pyýada gysga gezelençleri ýerine ýetirýär. Onuň boýy 2,15 metre deňdir, bu bolsa oňa Ginnesiň rekordlar kitabyna girmäge mümkinçilik döretdi.
7.Dostlar atly köpbölümli filmiň ýyldyzy Jennifer Eniston özüniň öňki ýanýoldaşy Bred Pitta garşy kazyýet işini gozgady.Muňa Pittiň Eniston bilen maslahatlaşman, olaryň bilelikdäki işewürligini (biznesini) satmak kararyna gelmegi sebäp boldy. 2000-nji ýyllaryň başynda şol wagt maşgala bolan Pitt we Eniston Plan B atly bilelikdäki kinokompaniýany döredipdiler.
Olar aýrylyşandan soňra kompaniýa Pittde galypdy, Eniston bolsa şol wagt oňa bolan hukuklary barada arza bermändi.
8. Türkmenistanyň ýaşlar ýygyndysy (U-14) Merkezi Aziýa futbol Assosiasiýasynyň (CAFA) çempionatyna gatnaşar. Bäsleşik 11-18-nji noýabr aralygynda Täjigistanyň Gissar şäherinde geçiriler. Bäsleşige Türkmenistandan başga-da ýene dört topar Owganystan, Eýran, Täjigistan we Özbegistan gatnaşar.