AFK Çempionlar Ligasy Elite ýaryşynda 3-nji duşuşyklar geçirilip, Günbatar sebitinde geçen möwsümiň çempiony “Al Ain” (BAE) öz meýdançasynda “Al Hilal” (S.Arabystany) bilen duşuşdy. Çekeleşikli we dartgynly geçen oýunda 9 gol hasaba alyndy. 5-4 hasabynda “Al Hilalyň” ýeňşi bilen tamamlanan duşuşykda her topardan 1 futbolçy het-trik etdi. 82-nji minutdan soň 1 oýunçy kem oýnan “Al Hilalyň” gollaryny Renan Lodi (26), Sergeý Milinkowiç- Sawiç (45+2) hem-de Salem Al-Dawsari (45+5, 65, 75) geçirdi.
Argentinaly Hernan Kresponyň şägirtlerindenem Sofian Rahiminiň het-trigi hem-de Mateo Sanabriýanyň goly ýeňşe ýetmedi.Duşuşygyň 77-nji minutynda “Al Hilalyň” braziliýaly ýyldyz oýunçysy Neýmar hem 370 günden soň meýdança dolandy.
Iki topar geçen möwsümde hem ýarym finalda duşuşypdy we Sofian Rahimi şol oýunlaryň birinjisinde hem het-trik edipdi. Şonda “Al Hilal” 4-2 hasabynda utulyp, olaryň 32 oýunlap dowam eden ýeňişli ýörişi tamamlanypdy.
Saud Arabystanynyň başga bir kluby “Al-Ahli” myhmançylykda Katarayň “Al-Raýýan” toparyndan Wiega hem-de Al-Buraikanyň gollary esasynda 2-1 hasabynda üstün çykdy.
“Al Saddyň (Katar) öz meýdançasynda Eýranyň “Persepolis” toparyny 1-0 ýeňen tapgyrynda “Al-Şorta” bilen “Pahtakoryň” arasyndaky duşuşykda hasap açylmady.
Şu gün Günbatar sebitinde “Esteglal” bilen “Al Nassr” hem-de “Al-Garafa” bilen “Al Wasl” toparlary duşuşarlar.