2024-nji ýylyň ýanwar — sentýabr aýlarynda Özbegistana täjirçilik we söwda maksady bilen baran daşary ýurtlularyň 64 göteriminden gowragyny türkmenistanlylar emele getirdi. Bu barada Özbegistanyň Prezidentiniň ýanyndaky Statistika agentligi habar berdi.
Bellenilişi ýaly, şu ýylyň dokuz aýynyň dowamynda 112,8 müň sany daşary ýurtly täjirçilik we söwda maksatlary bilen Özbegistana bardy. Şonuň 72,3 müň sanysy ýa-da 64 göterimi Türkmenistanyň raýatlarynyň paýyna düşýär. Şeýlelikde, goňşy ýurda täjirçilik we söwda maksatlary bilen barýan raýatlarynyň sany boýunça Türkmenistan birinji orny eýeledi. Şeýle-de bu sanawda ilkinji bäşlikden Täjigistan (31,5 müň), Owganystan (2,3 müň), Türkiýe (1 müň) hem-de Hytaý (0,9 müň) orun alypdyr.
Bilermenler soňky bir ýylyň dowamynda söwda we täjirçilik maksady bilen Özbegistana barýan türkmenistanlylaryň sanynyň görnetin artmagynda iki ýurduň arasyndaky söwda-ykdysady hyzmatdaşlygyň has işjeňleşmegini sebäp edip görkezýärler. Munuň şeýledigini türkmen-özbek söwda dolanyşygynyň ýylsaýyn artýandygy hem tassyklaýar.
Mundan ozal Turkmenportal 2024-nji ýylyň ýanwar — sentýabr aýlarynda Türkmenistan bilen Özbegistanyň arasyndaky söwda dolanyşygynyň 867,8 million dollardan gowrak bolandygyny habar beripdi.