ABŞ, Britaniýa, Fransiýa, Irlandiýa, Albaniýa we Ýaponiýa BMG-niň Howpsuzlyk geňeşiniň Demirgazyk Koreýanyň soňky raketa synagy boýunça geçiriljek maslahatdan ozal bilelikde beýannama berdiler.
ABŞ-nyň BMG-niň ýanyndaky hemişelik Wekili Linda Tomas Grinfild 6 ýurduň adyndan beren beýannamasynda Demirgazyk Koreýanyň 5-nji ýanwardaky ballistiki raketa synagyny ýazgarýandyklaryny nygtap, raketa synagynyň BMG-niň Howpsuzlyk geňeşiniň kararlaryna bap gelmeýändigini aýtdy.
Demirgazyk Koreýanyň köpçülikleýin gyryş ýaraglary we ballistiki raketa boýunça maksatnamalary halkara parahatçylygyna hem-de howpsuzlyga wehim salýandygyny beýan eden Tomas Grinfild resmi Phenýana ýadro maksatnamasyny we ballistiki raketa synaglaryny bes etmegi üçin çagyryş berdi.
Tomas Grinfild Demirgazyk Koreýanyň, halkynyň abadançylygynyň öwezine harby maýa goýumlaryny dowam etdirýändigine ünsi çekip, ýurduň halkynyň berk awtoritar dolanşykda günsaýyn agyrlaşýan gumanitar pajygany başdan geçirýändigini aýtdy.
Linda Tomas Grinfild Demirgazyk Koreýa durnuklylygy bozýan çemeleşmelerden çetde durmak we Koreýa ýarym adasynyň ýadro ýaraglaryndan saplanmagy üçin dialoga goşulmagy boýunça hem çagyryş berdi.
Soňky synagyny oktýabr aýynda geçiren Demirgazyk Koreýa 5-nji ýanwarda synagdan geçirilen raketanyň deňizasty gämisinden atylan täze görnüş ballistiki raketadygyny öňe sürüpdi.