ABŞ-nyň iň uly sport çäresi bolan “Super Bowl” duşuşygynda “Kanzas Siti Çifs” topary 50 ýyldan soň, çempionlyk gazandy.Amerikan futboly boýunça Milli liganyň (NFL) final duşuşygy bolan “Super Bowl” oýnunda “Kanzas Siti Çifs” bilen “San Fransisko 46ers” topary duşuşdy. 54-nji gezek geçirilen duşuşyk Florida ştatynyň Maýami şäherindäki “Hard Rock” stadionynda oýnaldy.
Oýnuň 1-nji çärýeginde 7:3 “Kanzas Siti” öňe çykýar. 2-nji çärýek hem şol hasap bilen “San Fransiskonyň” peýdasyna tamamlanýar.Toparlar arakesmä deňlik ýagdaýynda (10:10) çykýar. 3-nji çärýekde “San Fransisko” has şowly oýun görkezýär we 10:0 öňe saýlanýar (20:10).
Hemişe-de soňky minutlarda has netijeli çykyş edýän “Kanzas Siti” topary 4-nji çärýekde 21 utuk gazanýar.Netijede, 31:20 hasabynda ýeňiş gazanan “Kanzas Siti Çifs” topary 50 ýyldan soň, 2-nji gezek “Super Bowl” kubogyny asmana göterýär.Olar 1 gezegem finalda ýeňlipdiler.
Soňky sapar 1995-nji ýylda 5-nji çempionlygyny gazanan “San Fransisko 46ers” 2013-nji ýyldan soň, 7-nji finalynda 2-nji gezek ýeňlişe sezewar boldy.
Duşuşygyň iň gymmatly oýunçysy diýlip, çempion toparyň ýyldyzy Patrik Mahomes saýlandy. Maliýe babatda-da köpleriň ünsüni özüne çekýän “Super Bowl” duşuşygynyň arakesmesinde ýaýlymda görkezilen mahabatlaryň 60 sekundy üçin 10 million dollar tölendi. Şeýle-de, 1-nji ýarymdan soňky uly arakesmede dünýä belli aýdymçylar Şakira bilen Jennifer Lopez özleriniň iň gowy aýdymlary bilen çykyş etdiler.