Mälim bolşy ýaly, Microsoft kompaniýasynyň esaslandyryjysy Bill Geýts her ýylyň tomus we gyş pasyllarynda okalmagyny maslahat berýän kitaplarynyň sanawyny aýdýar. Belli işewür dynç alyş günlerinde okalmaly bäş kitabyň adyny mälim etdi.
67 ýaşly işewür bu barada CNBC teleýaýlymyna beren beýanatynda aýtdy. Ine, ylmy-fantastiki, taryh we beýleki mowzuklardaky kitaplaryň sanawy:
Ýat ýurtdaky keseki. Amerikan ýazyjysy Robert Haýnlaýnyň 1961-nji ýylda ýazan eserinde Marsda doglan we gaýry planetalylaryň arasynda önüp-ösen Walentin Maýkl Smit atly adam barada gürrüň berilýär.
Tabynlyk: 40 aýdym, bir hekaýat. Dünýä belli U2 aýdym-saz toparynyň wokalçysy Bononyň ýazan kitabynda awtor topardaşlary bilen başdangeçirmeleri barada gürrüň berýär.
Bäsdeşler topary. Amerikan zenan ýazyjysy, taryhçy Doris Kerns Gudwiniň bu eserinde ABŞ-nyň 16-njy Prezidenti Awraam Linkoln barada gürrüň berilýär.
Tennisde içki oýun. Timoti Golwiniň 1974-nji ýylda neşir edilen kitabynda awtoryň 1960-njy ýylda Garward uniwersitetinde tennis toparyna ýolbaşçylyk eden döwründäki başdangeçirmeleri gürrüň berilýär.
Mendeleýewiň arzuwy. Britan akademigi Pol Streterniň kitabynda 1869-njy ýylda periodik ulgamyň ilkinji nusgasyny döreden rus himigi Dmitriý Mendeleýew barada gürrüň berilýär.
Ahmet AKYÝEW,
Türkmenistanyň Döwlet migrasiýa gullugynyň Daşoguz welaýaty boýunça müdirliginiň harby gullukçysy, maýor.