Niderlandlaryň çempionatynda Amsterdamyň “Aýaks” topary 4 günüň dowamynda 2 esasy garşydaşyny ýeňmegi başardy.Italiýaly tälimçi Françesko Farioliniň şägirtleri ilki çarşenbe gününde 4-nji tapgyrdan galan duşuşykda myhmançylykda “Feýenoorddan” 2-0 hasabynda üstün çykdy.
Amsterdamlylara ýeňişe getiren gollary Teýlor (6) bilen Hato (25) geçirdi. “Aýaks” topary şenbe gününde-de sanawyň ýeňlişsiz liderini, 10 oýunda 10 ýeňiş gazanan PSW bilen öz meýdançasynda duşuşdy. 5 goluň geçirilen oýnunda PSW topary 2 gezek öňe saýlansa-da, “Aýaks” 3-2 hasabynda ýeňşini baýram etdi. Çekeleşikli geçen oýunda “Aýaksyň” gollaryny Klassen (44), Fits-Jim (66) hem-de Godts (74), eýndhowenlileriň gollaryny bolsa De Ýong (18) bilen Perişiç (54) derwezä girizdi. 4 günüň içinde 2 güýçli garşydaşyny ýeňen “Aýaks” 1 oýny kem 25 utuk bilen 2-nji orna beýgeldi.
Olar indiki tapgyrda özleri ýaly 1 oýny kem 25 utukly 3-nji ýerde barýan “Utreht” bilen güýç synanyşar.
Niderlandlaryň çempionaty “Eredivisie”-de PSW topary 10 oýundan soň ilkinji gezek ýeňlişe sezewar bolsa-da, olar 30 utuk bilen 1-nji orunda barýar.