Türkmenistanda TÜRKSOÝ-a agza ýurtlaryň ikinji teatr festiwaly geçirilýär, germaniýaly kardiohirurg Hans Maýsner Gurbanguly Berdimuhamedowa hoşallyk bildirdi, Aşgabatda Russiýanyň Medeniýet günleri tamamlandy we beýleki habarlar
Türkmenistanda
1. Şu gün aşgabatda Türki medeniýetiniň halkara guramasyna (TÜRKSOÝ) agza ýurtlaryň II teatr festiwaly başlanýar. Festiwalyň açylyş dabarasy Beýik Saparmyrat Türkmenbaşy adyndaky Baş akademiki drama teatrynda geçirildi. Festiwala alty sany türki dilli döwletden: Türkmenistandan, Azerbaýjandan, Türkiýeden, Özbegistandan, Gazagagystandan we Gyrgyzystandan diňe teatr işgärleri däl, eýsem, suratkeşler hem gatnaşýarlar.
2. Türkmenistanyň Prezidenti festiwala gatnaşyjylara Gutlag iberdi. Serdar Berdimuhamedow Gutlagynda türki dilli halklaryň arasyndaky medeni gatnaşyklary pugtalandyrmakda bu wakanyň ähmiýetini nygtady we festiwalyň teatr sungatynyň hakyky baýramçylygyna öwrüljekdigini belledi.
3.Germaniýaly kardiohirurg, lukmançylyk ylymlarynyň doktory, professor Hans Maýsnerden türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň adyna hat geldi, onda Hans Maýsner özüniň hoşallygyny beýan edýär. Ýeri gelende bellesek, Mejlisiň Karary bilen, türkmen paýtagtynyň şaýollarynyň birine professoryň ady dakyldy.
Aşgabadyň Lukmançylyk şäherçesindäki iň uly şaýoluna adymy dakmagyňyz meniň üçin uly hormatdyr we men muňa örän buýsanýaryn.Hoşallygymy söz bilen beýan etmek mümkin däl. Şol gün meniň durmuşymda aýratyn ýatdan çykmajak gün boldy diýip, Hans Maýsner hatynda belleýär.
4.Türkmenistanyň Döwlet medeniýet merkeziniň Mukamlar köşgünde Russiýa Federasiýasynyň Türkmenistandaky Medeniýet günleriniň ýapylyş dabarasy geçirildi.Pýotr Ilýiç Çaýkowskiniň ýubileýine tarap atly nusgawy saz konserti maksatnamanyň esasy wakasyna öwrüldi.
Konsertiň dowamynda Moskwanyň Döwlet akademiki filarmoniýasynyň aýdymçysy Dmitriý Masleýew P.I.Çaýkowskiniň we S.W.Rahmaninowyň eserlerini ýerine ýetirdi.Medeniýet günleriniň çäklerinde türkmen tomaşaçylaryna Russiýanyň Milli saz muzeýi tarapyndan taýýarlanan Çaýkowskiniň planetasy atly sergi, Russiýadan pursatlaryň mozaikasy atly amaly-haşam sungatynyň eserleriniň sergisi we russiýaly fotosuratçylaryň işleriniň fotosergisi guraldy.
5.Türkmenistan Ylymlar akademiýasynyň Magtymguly dil, edebiýat we milli golýazmalar instituty türkmen halkynyň medeni mirasy bilen baglanyşykly täze çeşmeleri işjeň gözleýär.Magtymguly Pyragynyň 300 ýyllygy mynasybetli bu işler aýratyn ähmiýete eýe boldy.
Golaýda institutyň ylmy işgärleri Germaniýadan gaýdyp geldiler, olar bu ýerde Berliniň we Drezdeniň kitaphanalarynyň golýazma gaznalaryny öwrendiler.Ylmy işgärler Magtymguly we türkmen taryhy bilen baglanyşykly gymmatly çeşmeleriň elektron nusgalaryny getirdiler.
Geçirilen ekspedisiýanyň netijesinde, Türkmenistana türk, pars we arap dillerindäki 200-den gowrak golýazmanyň elektron nusgalary alyndy.
6. Türkmenistan innowasiýalaryň we tehnologiki ösüşleriň görkezilişini guramaga taýýarlyk görýär. 14-16-njy noýabr aralygynda Aşgabatda Turkmentel-2024 atly halkara maslahat geçiriler. Forumyň maksatnamasy sanly ösüşler bilen telekommunikasiýanyň geljekki mümkinçiliklerinden başlap, emeli hemra tehnologiýalaryna we kiberhowpsuzlyga çenli dürli ugurlary öz içine alýar. Bu çäre dünýäniň dürli künjeklerinden alymlary, hünärmenleri we telekeçileri bir ýere jemlär.
Dünýäde
7.Kolumbiýanyň Kali şäherinde ýakyn wagtda geçiriljek BMG-niň biologiki dürlülik baradaky Konwensiýasynyň mejlisinde möhüm ekologiýa başlangyjyna serediler.Beýik Britaniýa we Çili kömelekleri haýwanlar we ösümlikler bilen deň derejede goralýan organizmleriň aýratyn ugry hökmünde kesgitlemegi teklip edýärler.
Bu başlangyç, kömelekleriň ekoulgamlardaky esasy ornuny görkezýän giňişleýin ylmy gözleglere esaslanýar.Olar topragy dikeltmäge, uglerodyň siňdirilmegine, hatda plastigiň we beýleki hapalaýjy maddalaryň dargadylmagyna gatnaşýarlar.
8.Sinsinnatide täsin talaňçylyk boldy.Jenaýatçylar Sole Bros aýakgap dükanyna girdiler we diňe aýakgaplaryň sag taýlaryny alyp gaçdylar, olaryň umumy sany ýüz jübütden geçýär.Dükanyň eýesi ýitgini wideo gözegçilik ulgamy arkaly ýüze çykardy.
Howpsuzlyk wideoýazgylarynda iki adamyň we bir aýalyň dükanyň tekjelerini boşadýandygy görkezilýär.Garakçylar aýakgapdan başga-da, köp mukdarda egin-eşik we dürli şahsy zatlary alypdyrlar.Zyýanyň umumy mukdary 45 müň dollar töweregi boldy.
Sport täzelikleri
9.Türkmenistanyň Futbol federasiýasy sentýabryň iň gowy oýunçysyny yglan etdi.Ol Altyn Asyr toparynyň hüjümçisi Mihail Titow boldy.Titow soňky bir aýyň dowamynda Ýokary liganyň iki oýnunda üç gol geçirdi.
Bu möwsümde hüjümçi eýýäm bäş gola adyny ýazdyrdy, bu bolsa oňa çempionatda iň köp gol salan oýunçylaryň onlugyna girmäge mümkinçilik berdi.Mundan başga-da, onuň gollarynyň biri janköýerler tarapyndan 22-nji tapgyryň iň owadan goly hökmünde ykrar edildi.
10.Türkmenistanyň futzal boýunça zenanlar ýygyndysynyň 2025-nji ýyldaky Aziýa Kubogynyň saýlama tapgyryndaky garşydaşlaryny tanadmälim boldy.Bije çekişligiň netijelerine görä, türkmen topary C toparça düşdi we bu ýerde Özbegistan, Awstraliýa, Filippinler we Kuweýt bilen duşuşar.
Bu toparçanyň saýlama oýunlary 2025-nji ýylyň 11 19-njy ýanwary aralygynda çenli Özbegistanda geçiriler.Her toparçadan iň gowy iki topar, şeýle hem üçünji orunlaryň arasynda iň gowy netije gazanan topar ýaryşyň final tapgyryna çykar.