Ýewropada möwsüm ahyrlap barýar we geljek hepdäniň ahyrynda ähli çempionatlar möwsümi jemlärler. Şol sanda UEFA-nyň ýaryşlarynda hem final duşuşyklary oýnalar. 18-nji 28-nji maý aralygyndaky 11 günüň dowamynda UEFA-nyň klub derejeli 4 ýaryşynyň final duşuşyklary geçiriler.
Olaryň ilkinjisi ertir, ýagny 18-nji maý, çarşenbe güni, ýarygijede (00:00), UEFA-nyň 2-nji derejeli bäsleşigi bolan, ozalky ady UEFA Kubogy, häzirki ady Ýewropa Ligasynyň finaly bolup, “Aýntraht” bilen Şotlandiýanyň “Reýnjersiň” arasynda oýnalar.
Ispaniýanyň Sewilýa şäherindäki Ramon Sançes Pishuanyň adyny göterýän stadionda oýnaljak finala sloweniýaly Slawko Winçiç eminlik eder. Ýeňiş gazanan topara Çempionlar Ligasyna gönümel gatnaşmaga ygtyýar berlip başlanmagyndan soň ýaryşyň ähmiýeti has-da artdy.
Ertirki final bäsleşigiň 51-nji final duşuşygy bolar.
2-nji final duşuşygy şenbe güni, 21-nji maýda Italiýanyň Turin şäherindäki Ýuwentus stadionynda oýnalar. Soňky ýyllarda aýratyn üns berilýän zenan futbolynyň klublar boýunça iň uly ýaryşy hasaplanýan UEFA Zenanlar Çempionlar Ligasynyň finalynda “Barselona” bilen “Lion” duşuşar. 21-nji sapar geçirilýän ýaryşyň finaly 22:00-da başlap, onda finlýandiýaly Lina Lehtowaara jürlewük çalar.
UEFA-nyň 3-nji finaly täze bäsleşigiň, Ýewropa Konferensiýa Ligasynyň finaly bolup, ol 25-nji maýda, çarşenbe güni Albaniýanyň paýtagty Tiranadaky Milli stadionda geçiriler. “Roma” bilen “Feýenoordyň” täze ýaryşyň ilkinji çempiony bolmak ugrundaky final duşuşygy Aşgabat wagty bilen 00:00-da başlar. Oýna rumyniýaly Istwan Kowaç eminlik eder.
Futbol bäsleşikleriniň seresi hasaplanýan UEFA Çempionlar Ligasynyň finaly-da 10 gündäki soňky final bolar. Parižiň golaýynda ýerleşýän Sen-Deni şäherçesindäki Stad de Frans stadionynda oýnaljak finalda “Liwerpul” bilen “Real Madrid” klublary duşuşar. 28-nji maý, şenbe güni 00:00-da başlanjak bu finala ýerli emin, fransiýaly Klemen Turpen eminlik eder.