Katar 2022-de 1/8 finalyň duşuşyklarynyň ilkinji gününde çärýek finalyň 1 duşuşygynyň taraplary belli boldy.
Günüň ilkinji duşuşygynda Niderlandlar ABŞ-nyň ýygyndysyny Depaý (10), Blind (45+1) hem-de Dumfrisiň (81) gollary bilen 3-1 hasabynda ýeňdi.ABŞ-nyň ýeke-täk goluny-da Haji Raýt derwezä girizdi (76).
Netijede, Niderlandlar 11-nji gezek gatnaşýan ýaryşynda 7-nji gezek çärýek finala çykdy.Niderlandlaryň çärýek finaldaky garşydaşy Argentina bolup, tangoçylar 1/8 finalda Awstraliýany 2-1 hasabynda ýeňlişe sezewar etdi.
Argentinanyň gollaryny 35-nji minutda Lionel Messi bilen 57-nji minutda goragçydyr derwezeçiniň gödek ýalňyşlygyndan soň Hulien Alwares derwezä girizdi.Duşuşygyň 77-nji minutynda-da Enzo Fernandesiň ýalňyşlyk bilen öz derwezesinden geçiren goly awstraliýalylary ymytlandyran hem bolsa, ýeňşe ýeterlik bolmady. Şunlukda, Argentinanyň ýygyndysy 10-njy gezek çärýek finala çykdy.
Bu duşuşyk super ýyldyz Lionel Messiniň karýerasyndaky 1000-nji duşuşygy hökmünde hasaba alyndy. Ýubileý duşuşygynda tapawutlanan Lionel Messiniň karýerasyndaky gollarynyň sany 789-a ýetdi.Dünýä Kubogyndaky 9-njy goluny geçiren Messi argentinalylaryň arasynda Diego Maradonadan (8) öňe saýlandy.
Ol ýene-de 2 gol geçirse, Dünýä Kubogy ýaryşlaryndaky iň köp gol geçiren argentinaly futbolçy bolan Gabriel Batistutadan öňe geçer.Messiniň Dünýä Kubogyndaky gollarynyň sany 9-a ýetmek bilen ol bu ugurda esasy bäsdeşi Kristinao Ronaldodan hem öňe saýlandy.
Katar 2022-de 3 gol geçiren Messi Polşa bilen geçirilen duşuşykda penalti hem geçirip bilmedi.
Argentinanyň ýygyndysy çärýek finalda Niderlandlaryň ýygyndysy bilen duşuşar. Duşuşyk 9-njy dekabrda, anna güni Lusail Iconic stadionynda oýnalar.